लोकवर्गणीतून बांधला पूल; खांडगेदरा ग्रामस्थांची कामगिरी !

आश्‍वी : खांडगेदरा (ता. संगमनेर) या अवघ्या पावणेचारशे लोकसंख्येच्या गावाने सरकारी मदतीची अपेक्षा न करता, गावाच्या ओढ्यावर १०० फूट लांबीचा पूल बांधून दळणवळणाची गैरसोय दूर केली आहे. गावाला कोठे खुर्दला जोडणाऱ्या सुमारे तीन किलोमीटरच्या रस्त्यावर ढोकरचोंड परिसरातील ओढ्याला पावसाळ्यात वाहणाऱ्या पाण्यामुळे प्रवासाची मोठी अडचण होत असे. गावातील पोलिस खात्यातील कर्मचारी रोहिदास ढोकरे सेवानिवृत्त झाल्याबद्दल त्यांचा गावाने सत्कार केला होता. त्या वेळी झालेल्या बैठकीत लोकवर्गणीतून ओढ्यावर पूल बांधण्याचा निर्णय झाला.  वनग्राम पुरस्काराचे एक लाख १५ हजार रुपये यासाठी वापरण्याबाबत एकमत झाले. लोकवर्गणीसाठी नोकरदारांकडून प्रत्येकी दोन हजार रुपये, चारचाकी वाहन असलेल्याकडून एक हजार, तर उंबऱ्यामागे दोन हजार, अशी वर्गणी करून, त्यातून दोन लाख रुपये जमा झाले. जिल्हा परिषद निवडणुकीचे उमेदवार बबनराव गागरे यांनी प्रस्तावित पुलासाठी सिमेंटच्या चार नळ्या दिल्या होत्या. संगमनेर साखर कारखान्याच्या माध्यमातून आमदार बाळासाहेब थोरात यांनी एक लाख रुपयांची मदत केली. बांधकाम साहित्याचा व मजुरीचा खर्च वगळता अन्य कामे ग्रामस्थांनी श्रमदानातून केली. त्यातून १०० फूट लांब, १६ फूट रुंद, ६० फूट उंचीच्या व सुमारे चार लाख रुपये खर्चाच्या पुलाचे काम जवळपास पूर्ण झाले आहे.  गावाला जोडणाऱ्या रस्त्यावरचा हा पूल सर्वांसाठीच महत्त्वाचा होता. शासनाच्या मदतीची वाट न पाहता ग्रामस्थांनी लोकवर्गणीतून हे काम करून नवा पायंडा पाडला आहे.  - महादू ढोकरे,  सेवानिवृत्त प्राथमिक शिक्षक 

गावात जिल्हा परिषदेची चौथीपर्यंत प्राथमिक शाळा आहे. पुढील शिक्षणासाठी कोठे खुर्द येथे जावे लागते. पावसाळ्यात ओढ्याला आलेल्या पाण्यामुळे अनेक वेळा शाळा बुडत असे. या पुलामुळे मोठी सोय झाली आहे.  - दर्शन ढोकरे, विद्यार्थी