तूर खरेदी केंद्राची शेतकऱ्यांना प्रतीक्षा

यवतमाळ : तूर खरेदीचा हंगाम सुरू होण्याच्या मार्गावर आहे. मात्र, अद्याप केंद्र सुरू करण्यासंदर्भात निर्णय झाला नाही. खरेदी विक्री संघाचा पाच कोटी रुपयांचा आनुषंगिक खर्च थकीत आहे. यावर निर्णय न झाल्याने खरेदी विक्री संघ तूर खरेदीच्या मूडमध्ये दिसत नसल्याचे चित्र आहे.

गेल्यावर्षी जानेवारीमध्ये तूर खरेदी सुरू झाली होती, शेतकऱ्यांनी तूर विक्रीसाठी फेब्रुवारी महिन्यात आणली. यंदा मात्र, अद्याप कुठलेही नियोजन नाही. संघांने केलेला आनुषंगिक खर्च जिल्हा मार्केटिंग अधिकाऱ्यांनी दिला नाही. त्यामुळे यंदा 'आधी रक्कम द्या, नंतरच खरेदीचे पाहू' असे धोरण संघाने घेतले आहे. त्यामुळे जानेवारी अर्ध्यावर आल्यानंतरही केंद्र सुरू करण्याबाबत निर्णय झाला नाही. तूर खरेदी करताना हमाली, बारदाने शिलाई पैसे, कमिशन आदींची थकबाकी मोठ्या प्रमाणात आहे.

संघाने दोन वर्षे सांभाळून घेतले. परंतु, आता खरेदी शक्‍य नसल्याचे संघांच्या संचालकांचे म्हणणे आहे. थकबाकीतील रक्कम द्या, त्यानंतर विचार करू, अशी त्यांची भूमिका आहे. यावर निर्णय घेण्यासाठी येत्या आठवड्याभरात जिल्ह्यातील सर्व खरेदी विक्री सभापतींची बैठक होणार आहे. त्यानंतरच पुढील रणनीती ठरेल.