सोलापुरात दूधदराच्या अनुदानाची शेतकऱ्यांना प्रतीक्षा

सोलापुरात दूधदराच्या अनुदानाची शेतकऱ्यांना प्रतीक्षा
सोलापुरात दूधदराच्या अनुदानाची शेतकऱ्यांना प्रतीक्षा

सोलापूर : सोलापूर जिल्ह्यातील दूध उत्पादकांना जिल्हा दूध संघाकडून दूध दराच्या अनुदानापोटी द्यावयाचे अनुदान वाटप अद्यापही रखडतच सुरू असल्याचे दिसून येते. सरकारकडे या अनुदानाचे सुमारे तीन कोटी रुपये येणेबाकी असल्याचे संघाकडून सांगण्यात येते. प्रत्यक्षात अनुदान वाटपाच्या कामात अद्यापही सुसूत्रता आलेली नाही. या सगळ्यामध्ये शेतकऱ्यांच्या वाट्याला मात्र प्रतीक्षाच आली आहे.

सोलापूर जिल्हा दूध संघाला दूध घालणाऱ्या ५७२ दूध संस्था आहेत. या संस्थांचे व्यवहार असणाऱ्या २७५ बॅंका आहेत. त्यानुसार त्याचे नियोजन व्हायला हवे. सरकारने गाईच्या दूध खरेदीसाठी शेतकऱ्यांना पाच रुपयांचे अनुदान जाहीर केले आहे. ही रक्कम मिळवण्यासाठी दूध उत्पादक संस्थांना अडचणी येत आहेत. त्यावर तोडगा काढण्यासाठी पुढाकार घेतला आहे. पण अद्यापही त्यात फारशी प्रगती झालेली नाही. दूध संस्थांचे पदाधिकारी बॅंका आणि संघाकडे हेलपाटे मारत आहेत.

या अनुदानासाठी संस्थांना संबंधित शेतकऱ्यांचे खातेनंबर, दूध संकलन याची माहिती संबंधित अनुदानासाठी द्यावयाची आहे. त्यानंतर संघाकडून त्याची खातरजमा करून ते बॅंकेत जाणार आहे. या सगळ्यामध्ये वेळतर चालला आहेच. पण प्रत्यक्षात हाती मात्र काहीच लागत नाही. काही मोजक्‍या दूध संस्था सोडल्या, तर अद्यापही अनेक दूध संस्था या अनुदानाच्या प्रतीक्षेत आहेत.

शेतकरी थेट दूध संस्था चालकांना जबाबदार धरत असल्याने त्यांचीही अडचण होऊन बसली आहे. सर्व नोंदी, खातेनंबर व्यवस्थित असल्याशिवाय अनुदानही जमा होत नसल्याने त्या अडचणीत आणखीनच भर पडली आहे.

संघाकडून बॅंकनिहाय कर्मचारी जिल्हा दूध संघाचे अध्यक्ष आमदार प्रशांत परिचारक यांनी या कामासाठी पुढाकार घेऊन संचालक मंडळाची नुकतीच बैठक घेतली. त्यात अडचणी सोडविण्यासाठी दूध संघाचे कर्मचारी बॅंक शाखानिहाय नियुक्त करण्याची सूचना त्यांनी केली. यात परिचारक यांनी योजनेचा आढावा घेतला. सरकारने दिलेले अनुदान दूध उत्पादकांना मिळवून देण्यासाठी संस्थांत जागृती करा, अनुदानासाठी आवश्‍यक असलेली माहिती वेळेत पुरविण्यासाठी संघाची यंत्रणा तत्पर करा, अशा सूचनाही त्यांनी दिल्या. व्यवस्थापकीय संचालक सतीश मुळे यांनीही काही सूचना या वेळी मांडल्या.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com