सत्तेवर आल्यास गुजरातमध्येही शेतकऱ्यांची कर्जमाफी ः राहुल गांधी

सुरेंद्रनगर, गुजरात : शेतकरी हित लक्षात घेऊन कर्नाटक आणि पंजाब येथील कॉंग्रेस सरकारने शेतकऱ्यांची कर्जमाफी केली. परिणामी उत्तर प्रदेशसारख्या भाजपशासित राज्यालाही आमच्या दबावामुळे कर्जमाफीची घोषणा करावी लागली आहे. शेतकऱ्यांच्या कल्याणाप्रती आम्ही जागरूक असून सत्तेवर आल्यास गुजरातमध्येही शेतकऱ्यांची कर्जमाफी करू, असे आश्वासन कॉंग्रेसचे उपाध्यक्ष राहुल गांधी यांनी बुधवारी (ता. २७) चोटीला येथे दिले.

गुजरातमध्ये राहुल यांचा तीन दिवसांचा दौरा सुरू आहे. बुधवारी चोटीला येथे राहुल यांनी ग्रामीण जनतेला संबोधित केले. राहुल म्हणाले, की विकासाला येथे काय झाले आहे. खरे तर विकासच वेडा झाला आहे. सरकारला शेतकरी आणि ग्रामीण जनतेशी काहीही देणेघेणे नाही. आम्ही कॉंग्रेसशासित राज्यांमध्ये शेतकरी कर्जमाफी केली. तसेच इतर राज्यांमध्येही असा निर्णय व्हावा यासाठी सरकारवर दबाव तयार केला.

यामुळे उत्तर प्रदेशसारख्या भाजपशासित राज्यालाही कर्जमाफी करावी लागली. पंतप्रधान म्हणताहेत की हजारो कोटींचे गुंतवणूक करार केले आहेत. प्रत्यक्षात स्थानिक पातळीवर याचा मागमूसही दिसत नाही. ही परिस्थिती बदलण्याची गरज आहे. शेतकरी हितासाठी कॉंग्रेस शेतीविरोधी धोरणांचा कायम विरोध करणार असून निवडणुकानंतर सत्तेत आलो तर गुजरातमध्येही शेतकऱ्यांची कर्जमाफी करू. टि्वटरवरूनही हल्लाबोल 'लेडीज अँड जंटलमन, मी विमानाचा को-पायलेट आणि अर्थमंत्री बोलत आहे. कृपया आपला सीट बेल्ट घट्ट बांधून घ्या. जागेवर बसून राहा. कारण आपल्या विमानाचे पंख गळून पडले आहेत', अशा शब्दांत राहुल यांनी टि्वटरवरून हल्लाबोल केला आहे. बुधवारी भाजपचे ज्येष्ठ नेते यशवंत सिन्हा यांनी केंद्र सरकारच्या चुकीच्या धोरणामुळे अर्थव्यवस्था ढासळत असल्याची टीका केली होती.