वारकरी केंद्रबिंदू मानून पंढरपूरच्या विकासास प्राधान्य ः चंद्रकांत पाटील

पंढरपूर, जि. सोलापूर  ः पंढरपूरमध्ये विठ्ठलाच्या दर्शनाच्या ओढीने येणाऱ्या वारकरी-भाविकांना सर्व प्रकारच्या सोयीसुविधा उपलब्ध करून देण्यास प्राधान्य दिले आहे. राज्य शासन वारकरी केंद्र बिंदू मानून पंढरपूर, पालखी मार्ग, पालखी तळांचा विकास करत अाहे, अशी माहिती महसूल, मदत व पुनर्वसन आणि सार्वजनिक बांधकाममंत्री चंद्रकांत पाटील यांनी येथे दिली. कार्तिकी एकादशीनिमित्त शासकीय महापूजेसाठी महसूलमंत्री पाटील पंढरपूर येथे आले असून, त्यांनी या वेळी पंढरपुरातील विविध मठांना भेटी दिल्या. त्या प्रसंगी मठातील महाराज, वारकरी, फडकरी यांच्या संवाद साधताना ते बोलत होते. या वेळी त्यांच्यासमवेत जिल्ह्याचे पालकमंत्री विजय देशमुख, आमदार प्रशांत परिचार, मंदिर समितीचे अध्यक्ष अतुल भोसले, शेखर चरेगावकर, श्रीकांत भारतीय, माजी मंत्री आण्णासाहेब डांगे, सहायक पोलिस अधीक्षक निखिल पिंगळे, तहसीलदार मधुसूदन बर्गे यांच्यासह मान्यवर पदाधिकारी, अधिकारी व वारकरी-भाविक उपस्थित होते. महसूलमंत्री पाटील यांनी पंढपुरातील मच्छिंद्र महाराज मठ, मारुती बुवा कराडकर मठ, देहूकर महाराज मठ, तात्यासाहेब वासकर महाराज मठ, आप्पासाहेब वासकर महाराज मठ, यादव महाराज मठ यासह अन्य मठांना भेटी देऊन मठातील महाराजांकडून वारी, वारकऱ्यांच्या समस्या याबाबत चर्चा केली. या वेळी महसूलमंत्री पाटील म्हणाले, की मठ आणि परिसरात असणाऱ्या समस्या सोडविण्यास प्राधान्य दिले जाईल. पंढरपुरातील स्वच्छता, चंद्रभागा नदीपात्राची स्वच्छता ही कामे प्राधान्याने केली जातील. या वेळी मठातील महाराज मंडळींनी आपआपल्या समस्या महसूलमंत्र्यांना सांगितल्या. या समस्यांचे निराकरण करण्यात प्राधान्य देण्यात येईल, असे महसूलमंत्री पाटील यांनी या वेळी सांगितले.