वारणा कारखाना उसाला प्रतिटन २९०० रुपये दर देणार

वारणानगर, जि. कोल्हापूर ः येथील तात्यासाहेब कोरे वारणा सहकारी साखर कारखान्यात हंगामात गळीत झालेल्या उसास प्रतिटन २९०० रुपये देणार, सातत्याने ऊस पुरवठा करणारे व संयुक्त शेअर्स असलेल्यांना निकषानुसार स्वतंत्र सभासदत्व देणार, वारणेस शंभर टक्के ऊस घालणाऱ्या गावातील सर्व पाणंद रस्ते कारखान्यामार्फत करणार असल्याची घोषणा वारणा समूहाचे नेते डॉ. विनय कोरे यांनी येथे केली.

येथील वारणा सहकारी साखर कारखान्याची ६२ वी वार्षिक सभा झाली. या वेळी डॉ. कोरे बोलत होते. अध्यक्षस्थानी अध्यक्षा शोभाताई कोरे होत्या. या वेळी वारणा दूध संघाचे उपाध्यक्ष डॉ. भाऊसाहेब गुळवणी, कारखान्याचे सर्व संचालक, एक्‍झिक्‍युटीव्ह डायरेक्‍टर व्ही. एस. चव्हाण, कायदेशीर सल्लागार ॲड. शिवाजीराव चव्हाण, ॲड. एन. आर. पाटील, ॲड. जी. जी. नानीवडेकर, बॅंक ऑफ इंडियाचे शाखा प्रबंधक विमलकुमार यांच्यासह वारणा समूहातील पदाधिकारी, सभासद उपस्थित होते. प्रा. पी. बी. बंडगर यांनी सूत्रसंचालन केले. उपाध्यक्ष प्रतापराव पाटील यांनी आभार मानले. प्रभारी कार्यकारी संचालक विजयकुमार कोले यांनी विषयवाचन केले. सर्व विषय सभासदांनी मंजूर केले.

प्रशासकीय अधिकारी दादासाहेब जाधव यांनी श्रद्धांजलीचा ठराव मांडला. पुणे येथील व्ही. एस. आयचा (कै.) वसंतराव नाईक ऊसभूषण पुरस्कारप्राप्त सभासद श्रीमती सुशिला बाबासाहेब पाटील (ऐतवडे खुर्द, ता. वाळवा), भारतीय शुगर आदर्श ऊस उत्पादक पुरस्कारप्राप्त आनंदराव ईश्‍वरा पाटील (तांदुळवाडी), वारणा कारखान्याच्या अध्यक्षा शोभाताई कोरे यांना गडहिंग्लज येथील श्रीमती रत्नमाला घाळी समाजभूषण पुरस्कार मिळालेबद्दल त्यांचा सत्कार करण्यात आला.

कमी गाळप झाल्याने अडचणी कमी गत हंगामात वारणाचे १० लाख ८१ हजार टन उसाचे गाळप, उतारा १२.७ तर १३ लाख २६ हजार साखरेची पोती झाले. देशातच साखरेचे प्रचंड उत्पादन झाल्याने कारखान्यांने संकट आले. वारणेचे कमी गाळप झाल्याने अडचणींही कमी झाल्या.