पुण्यातील धरणांमधील पाणीसाठा वाढण्यास सुरवात

पुणे  : जिल्ह्यातील धरणांच्या पाणलोट क्षेत्रात दोन दिवसांपासून पावसाने जोर धरला आहे. पाणलोटातील झरे, ओढे, नाले, नद्यांना पाणी आल्याने धरणांमधील पाणीसाठ्यात वाढ होण्यास सुरवात झाली आहे. मंगळवारी सकाळी आठ वाजेपर्यंतच्या २४ तासांमध्ये जिल्ह्यातील सर्व धरणांमध्ये जवळपास दीड टीएमसी पाणी जमा झाल्याचे पाटबंधारे विभागातर्फे सांगण्यात आले. जिल्ह्यातील सर्व धरणांमध्ये मिळून १६.९५ टीएमसी (७.८२) पाणीसाठा उपलब्ध आहे.

पावसाला उशीर झाल्याने जिल्ह्यातील अनेक धरणे अचल (मृत) पातळीत गेली होती. मात्र पावसाला सुरवात होताच सर्व धरणांमध्ये पाणी जमा होऊ लागण्याने धरणांची पाणीपातळी चल (उपयुक्त) पातळीत आली आहेत. उजनी धरणाचा पाणीसाठा अचल पातळीमध्ये गेला आहे. मंगळवारी (ता. २६) उजनी धरणाच्या अचल साठ्यामध्ये जवळपास ५३ टीएमसी पाणीसाठा शिल्लक आहे.

पिंपळगाव जोगे, घोड, वरसगाव, टेमघर ही धरणे मृतसाठ्यात असून, नाझरे, वडज, विसापूर धरणांमध्ये अत्यल्प पाणीसाठा आहे. यंदा गतवर्षीच्या तुलनेत अधिक पाणीसाठा उपलब्ध असून, गेल्या वर्षी याच तारखेला जिल्ह्यातील सर्व धरणांमध्ये मिळून १२.७० टीएमसी (५.८६) टीएमसी पाणीसाठा शिल्लक होता. धरणांमध्ये हळूहळू पाणी येऊ  लागल्याने धरणांचा पाणीसाठा वाढणार असला, तरी आणखी जोरदार पावसाची प्रतीक्षा आहे. 

मंगळवारी सकाळपर्यंतच्या २४ तासांमध्ये मुठा खोऱ्यातील पानशेत आणि खडकवासला धरणात ०.१७ , नीरा नदीच्या खाऱ्यातील धरणांमध्ये ०.२७, कुकडी नदीच्या खोऱ्यात ०.३८, मुळशी धरणात ०.३२, कलमोडी धरणात ०.१३ टीएमसी आणि इतर धरणांमध्ये मिळून १.४६ टीएमसी नवीन पाणी जमा झाले   होते.

जिल्ह्यातील धरणांमधील पाणीसाठा (टीएमसीमध्ये) : पानशेत २.६४, खडकवासला ०.२९, पवना १.७६, कासारसाई ०.१२, मुळशी ०.३९, कलमोडी ०.३२, चासकमान ०.५६, भामा अासखेड २.४९, आंद्रा १.५९, वडिवळे ०.३७, गुंजवणी ०.७३, भाटघर १.६१, नीरा देवघर ०.४४, वीर १.०९, माणिकडोह ०.६०, येडगाव १.३७, वडज ०.१०, डिंभे ०.४१.