पुणे, साताऱ्यातील ७ तालुक्यांत अद्यापही पाणीटंचाई

पुणे  : पुणे व सातारा जिल्ह्यांच्या पश्‍चिम भागात पावसाने जोरदार हजेरी लावली आहे. मात्र, पूर्व भागात असलेल्या दुष्काळी पट्ट्यात मात्र समाधानकारक पाऊस झालेला नाही. त्यामुळे या दोन्ही जिल्ह्यांमधील ७ तालुक्यांमध्ये पाणीटंचाईच्या झळा कायम आहेत. पुणे व सातारा जिल्ह्यांतील २६ गावे ११२ वाड्यांना २३ टॅंकरने पाणीपुरवठा करण्यात येत असल्याची माहिती विभागीय आयुक्त कार्यालयातर्फे देण्यात आली.  

पावसाने हजेरी लावल्यानंतर विभागातील पाणीटंचाई कमी होत आहे. मात्र, सातारा जिल्‍ह्याच्या खटाव, माण, कोरेगाव, खंडाळा या चार तालुक्यांतील २२ गावे आणि ७० वाड्यांमधील ३४ हजार ५४७ लोकसंख्या आणि ३ हजार १६७ जनावरांची तहान टॅंकरच्या पाण्यावर भागत असून, पाणीपुरवठ्यासाठी २२ टॅंकर धावत आहेत.

पुणे जिल्ह्यातील बारामती, पुरंदर आणि दौंड तालुक्यांमधील ४ गावे ४२ वाड्यांमधील ११ हजार १२ लोकसंख्येला टॅंकरने पाणीपुरवठा करावा लागत आहेत. टंचाईग्रस्त भागातील पाणीटंचाई दूर होण्यासाठी दमदार पावसाची आवश्‍यकता अाहे.