जोरदार पावसाअभावी पुणे विभागात पाणीटंचाई कायम

पुणे : मॉन्सून दाखल झाल्यानंतर पुणे विभागातील दुष्काळी भागात अद्यापही समाधानकारक पावसाने हजेरी लावलेली नाही. विभागातील पाणीटंचाई कमी होत असली तरी अनेक भागांत तीव्रता अद्यापही कायम असल्याचे चित्र आहे. पुणे, सातारा, सांगली जिल्ह्यांतील १३ तालुक्‍यांमधील ३६ गावे १४३ वाड्यांना ३२ टॅंकरने पाणीपुरवठा करण्यात येत असल्याची माहिती विभागीय आयुक्त कार्यालयातर्फे देण्यात आली.

सातारा जिल्ह्यातील दुष्काळी भागात पाणीटंचाईच्या झळा अधिक आहेत. जिल्ह्यातील २७ गावे, ८२ वाड्यांमधील सुमारे ४१ हजार लोकसंख्या आणि पाच हजारांहून अधिक जनावरांसाठी २० टॅंकरने पाणीपुरवठा करण्यात येत आहे. पुणे जिल्ह्यातील ६ तालुक्‍यांतील ४ गावे ५८ वाड्यांना ९ टॅंकर, तर सांगली जिल्ह्यातील खानापूर तालुक्‍यातील ५ गावे एका वाडीला तीन टॅंकरद्वारे पाणीपुरवठा करण्यात येत आहे. कोल्हापूरमधील दुर्गम भागातील वाडीवस्त्यांमधील नागरिकांना; तसेच जनावरांना पाणीटंचाईचा सामना करावा लागत आहे. विभागात गतवर्षी याच कालावधीत टंचाईची तीव्रता अधिक होती. विभागातील २७९ गावे आणि १७८६ वाड्यांना २६७ टॅंकरने पाणीपुरवठा करावा लागत होता.

सांगलीतील १५१ गावे १०९० गावांना १५१ टॅंकर, साताऱ्यातील ९३ गावे २७८ वाड्यांना ६० टॅंकर, पुणे जिल्ह्यातील ३० गावे ४०० वाड्यांना ३० टॅंकरने, तर सोलापुरातील ५ गावे १८ वाड्यांना ४ टॅंकरने पाणीपुरवठा करण्यात येत होता. यंदा सांगली जिल्ह्यात पाणीटंचाईची तीव्रता कमी आहे. सोलापूर जिल्ह्यात पाणीटंचाई भासलेली नाही. विभागातील पाणीटंचाई दूर होण्यासाठी जोरदार पावसाची आवश्‍यकता आहे. विभागातील टॅंकरद्वारे पाणीपुरवठ्याची स्थिती : सातारा : खटाव ६, माण ५, कोरेगाव ५, वाई २, कराड १, खंडाळा १. पुणे : जुन्नर २, खेड १, बारामती ३, पुरंदर २, दौंड १, मुळशी १. सांगली : खानापूर ३.