नगर जिल्ह्यातील ६३६ वैयक्तिक पाणी योजना बंद

संग्रहित छायाचित्र
संग्रहित छायाचित्र

नगर  ः जिल्ह्यात यंदा दुष्काळाचा सर्वाधिक परिणाम गाव पातळीवर पाणीपुरवठा करणाऱ्या पाणी योजनांवर झालेला आहे. जिल्ह्यात सध्या १४२८ वैयक्तिक पाणीपुरवठा योजनांपैकी तब्बल ६३६ पाणीपुरवठा योजना बंद आहेत. त्यातील ६११ पाणी योजना केवळ पाणी नसल्याने बंद आहेत. दक्षिण भागातील दुष्काळग्रस्त तालुक्यात बंद योजनांची संख्या अधिक आहे, असे नगर जिल्हा परिषदेच्या ग्रामीण पाणीपुरवठा विभागातून सांगण्यात आले. 

जिल्ह्यात यंदा दुष्काळाची तीव्रता अधिक आहे. गेल्या वर्षी पुरेसा पाऊस झालेला नसल्याने बहुतांश पिण्याच्या पाण्याचे स्रोत भरले नाहीत. त्याचा परिणाम गाव पातळीवर असलेल्या वैयक्तिक पाणी योजनांवर झाला. काही गावांत तर नोव्हेंबर- डिसेंबरमध्येच स्रोत आटल्याने पाणी योजना बंद पडल्या. त्यात फेब्रुवारीनंतर अधिक भर पडत गेली. यंदा उन्हाळ्यात मार्चमध्ये बंद पडलेल्या वैयक्तिक पाणीयोजनांची संख्या साडेचारशेच्या जवळपास होती. आता ही संख्या सुमारे ६३८  झाली आहे. त्यातील पंचवीस पाणीयोजना पाइपलाइन नादुरुस्त असल्याने बंद असल्या तरी, तब्बल ६११ वैयक्तिक पाणी योजना केवळ पाणी नसल्याने बंद आहेत.

दुष्काळाच्या सर्वाधिक झळा सोसत असलेल्या पारनेर, नगर, कर्जत, श्रीगोंदा, शेवगाव, पाथर्डी भागात बंद असलेल्या योजनांची संख्या अधिक आहे. ज्या गावांत नळयोजना बंद आहे, अन्य ठिकाणाहूनही पाण्याचा स्रोत बंद आहे, तेथे टॅंकरने पाणीपुरवठा केला जात आहे. अनेक गावांत आठ दिवसांत एकदा टॅंकरचे पाणी मिळत आहे. मात्र तब्बल पन्नास टक्के पाणी योजना पाण्याअभावी बंद पडण्याची ही पहिलीच वेळ आहे. 

बंद असलेल्या तालुकानिहाय पाणी योजना : अकोले ः ८, संगमनेर ः ७८, कोपरगाव ः ८, राहाता ः ३, राहुरी ः ४, श्रीरामपूर ः ३, नेवासा ः २०, शेवगाव ः १४, पाथर्डी ः ९८, नगर ः ५२, पारनेर ९२, श्रीगोंदा ः ७५, कर्जत ः १००, जामखेड ः ८१. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com