पुणे, साताऱ्यातील १५ गावे, ७५ वाड्यांमध्ये पाणीटंचाई

पुणे  : पुणे व सातारा जिल्ह्यांच्या पश्‍चिम भागात पावसाने जोरदार हजेरी लावल्याने धरणे ओसंडून वाहू लागली आहेत. दुसरीकडे पूर्व भागातील दुष्काळी पट्ट्यात पावसाची दडी कायम असल्याचे चित्र आहे. त्यामुळे या दोन्ही जिल्ह्यांमधील ५ तालुक्यांत पाणीटंचाईच्या झळा अद्यापही कायम आहेत. पुणे व सातारा जिल्ह्यांतील १५ गावे, ७५ वाड्यांना १४ टॅंकरने पाणीपुरवठा करण्यात येत असल्याची माहिती विभागीय आयुक्त कार्यालयातर्फे देण्यात आली.  

पावसाने हजेरी लावल्यानंतर टंचाईग्रस्त तालुक्यांना दिलासा मिळाला. मात्र, या तालुक्यांमधील काही गावांमध्ये पाणीटंचाई दूर होण्यासाठी पुरेसा पाऊस पडला नाही. सातारा जिल्‍ह्याच्या खटाव, माण या दोन तालुक्यांतील ११ गावे आणि ३९ वाड्यांमधील १५ हजार ४४५ लोकसंख्येची तहान भागवण्यासाठी ९ टॅंकरने पाणीपुरवठा केला जात आहे. पुणे जिल्ह्यातील बारामती, पुरंदर आणि दौंड तालुक्यांमध्ये ४ गावे, ३६ वाड्यांमधील ९ हजार ५४७ लोकसंख्येला ५ टॅंकरने पिण्याचे पाणी पुरविण्यात येत आहे.

पावसाचा खंड हेच पाणीटंचाईचे कारण विभागात सध्या पाणीटंचाई जाणवत असलेले तालुके कोरडवाहू पट्ट्यात आहेत. या पट्ट्यात पावसाचे प्रमाण खूप कमी आहे. यातच पावसाने उघडीप दिल्याने पडलेले खंड, पावसाचे असमान वितरण हेच पाणीटंचाईचे मुख्य कारण आहे. जून महिन्यात पडलेल्या पूर्वमोसमी पावसाने या तालुक्यांमध्ये सरासरी वाढली, मात्र टंचाई दूर करण्यास ती पुरेशी ठरली नाही.

त्यानंतर पावसाने दडी मारल्याने पाणीटंचाई कायम आहे. जून ते सप्टेंबर या चार महिन्यांत पडणाऱ्या एकूण पावसाचा विचार करता आतापर्यंत बारामती, दौंड, आणि माण तालुक्यात ५० टक्केही पाऊस पडलेला नाही. त्यामानाने पुरंदर आणि खटावमध्ये पावसाचे प्रमाण चांगले असल्याचे कृषी विभागातर्फे सांगण्यात आले.