खानदेशात पाणीटंचाईची समस्या भीषण

खानदेशात पाणीटंचाईची समस्या भीषण
खानदेशात पाणीटंचाईची समस्या भीषण

जळगाव : खानदेशातील पाणीटंचाईची समस्या दिवसेंदिवस भीषण होत आहे. नंदुरबार जिल्ह्यातील नंदुरबार तालुक्‍यात १२ गावांमध्ये टंचाईस्थिती वाढत आहे. पावसाअभावी विहिरी, कूपनलिकांची पाणी पातळी न वाढल्याने पिण्याच्या पाण्यासाठी अनेक गावांत स्रोत उपलब्ध नसल्याची स्थिती आहे.

धुळे जिल्ह्यात टॅंकरची संख्या कमी दिसत असली तरी अनेक गावांमध्ये पिण्याचे व घरगुती वापरासाठी पाणी पुरेशा प्रमाणात मिळत नाही. जळगाव जिल्ह्यात अमळनेर, जामनेर व बोदवड तालुक्‍यात समस्या वाढू लागली आहे. अमळनेर तालुक्‍यात नगाव, मंगरूळ, जानवे आदी भागांत पुढे समस्या तीव्र होईल. शेतशिवारातही अशीच स्थिती आहे. जामनेर तालुक्‍यातील पळासखेडे मिराचे, रोटवद भागात समस्या वाढेल, अशी स्थिती आहे. पाचोरा तालुक्‍यातील लोहारा व परिसरातही पिण्याच्या पाण्याची समस्या भीषण होण्याचे संकेत आहेत. जळगाव जिल्ह्यात १२ टॅंकर सुरू आहेत. सर्वाधिक १० टॅंकर अमळनेर तालुक्‍यात सुरू आहेत.

नंदुरबार जिल्ह्यातील धमडाई, पथराई, पळाशी, कोळदे, लहान शहादे, कोठली, खोंडामळी, तिसी, चौपाळे भागात जलसंकट वाढण्याची भिती आहे. कोळदे येथे गावशिवारातील विहिरींवरून पिण्यासाठी पाणी आण्याची वेळ ग्रामस्थांवर आली आहे.

जूनमध्ये धुळे व जळगावच्या पश्‍चिम भागातील पारोळा, अमळनेरात काही ठिकाणी जलयुक्त शिवार अभियानाच्या कामांमध्ये झालेला जलसंचय आटला आहे. ऑगस्टमधील पाऊस भिज स्वरुपाचा होता. जोरदार पाऊस कुठेही झाला नाही. गिरणा, वाघूर, अंजनी, कांग, बोरी, पांझरा आदी नद्यांचा चांगला प्रवाह आला नाही. पांझरा नदीतून मध्यंतरी काही दिवस पाण्याचा प्रवाह सोडला होता. पण तोदेखील बंद झाला आहे.

धुळे जिल्ह्यातील शिंदखेडा व साक्री भागात, जळगाव जिल्ह्यातील पारोळा, पाचोरा, भडगाव, जामनेर, अमळनेर, धरणगाव भागात, तर नंदुरबारमधील नंदुरबार, शहादा तालुक्‍यातील अनेक गावांमध्ये जलसंकट आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com