औरंगाबाद : मराठवाड्यातील पाणीसाठ्यांमधील उपयुक्‍त पाणीसाठ्याचा टक्‍का गत पंधरवड्याच्या तुलनेत जवळपास स्थिर आहे. मध्यम व मोठ्या प्रकल्पांमधील उपयुक्‍त पाणीसाठ्यात जवळपास एक टक्‍का वाढ, तर लघू प्रकल्पांमधील पाणीसाठ्यात जवळपास दोन टक्‍के घट नोंदविली गेली आहे.
मराठवाड्यातील अकरा मोठ्या प्रकल्पांत गत आठवड्यात ६५.८४ टक्‍के उपयुक्‍त पाणीसाठा होता. तो ऑक्‍टोबरअखेर ६६.६१ टक्क्यांवर पोचला आहे. जायकवाडी, माजलगाव, मांजरा, निम्न तेरणा, सिनाकोळेगाव हे मोठे प्रकल्प तुडुंब झाले आहेत.
मागील आठवड्याच्या तुलनेत जवळपास दोन दलघमीने पाणीसाठा वाढलेल्या परभणी जिल्ह्यातील येलदरीचा उपयुक्‍त पाणीसाठा मात्र १४ टक्‍क्‍यांवरच आहे. दुसरीकडे ऊर्ध्व पेनगंगा प्रकल्पातील उपयुक्‍त पाणीसाठाही १४ टक्‍क्‍यांवरच आहे. नांदेडमधील निम्न मनार प्रकल्पात केवळ २३ टक्‍के उपयुक्‍त पाणीसाठा असून, निम्न दुधना प्रकल्पात ७८ टक्‍के, विष्णुपुरी ९९ टक्‍के, तर सिद्धेश्वर प्रकल्पात ५८ टक्‍के उपयुक्‍त पाणीसाठा झाला आहे.
मराठवाड्यातील ७५ मध्यम प्रकल्पांमध्ये ऑक्‍टोबरच्या पहिल्या पंधरवड्यात ६६.९९ टक्‍के उपयुक्‍त पाणीसाठा होता. त्यामध्ये जवळपास एक टक्‍क्‍याची वाढ होऊन हा पाणीसाठा आता ६७.६९ टक्क्यांवर पोचला आहे. ७४३ लघू प्रकल्पांत गत पंधरवड्यात ५८.६५ टक्‍के असलेला उपयुक्‍त पाणीसाठा ऑक्‍टोबरअखेर ५६.५६ वर आला आहे.
तेरणा, मांजरा, रेणा नदीवरील २४ प्रकल्पांमध्ये गत पंधरवड्यात ७६.३४ टक्‍के असलेला उपयुक्‍त पाणीसाठा ७६.८० टक्क्यांवर, तर गोदावरी नदीवरील ११ बंधाऱ्यांमध्ये ८३.२२ टक्‍के असलेला उपयुक्‍त पाणीसाठा आता ८५.७५ टक्क्यांवर पोचला असल्याची माहिती जलसंपदा विभागाच्या सूत्रांनी दिली. सहा मध्यम प्रकल्पांत नाही उपयुक्‍त पाणी मराठवाड्यातील सहा मध्यम प्रकल्पांत उपयुक्‍त पाण्याचा थेंब नाही. विशेष म्हणजे हे सर्वच्या सर्व सहा मध्यम प्रकल्प औरंगाबाद जिल्ह्यातीलच आहेत. औरंगाबाद जिल्ह्यातील १६ मध्यम प्रकल्पांत केवळ ३५ टक्‍के उपयुक्‍त पाणीसाठा झाला आहे. दुसरीकडे जिल्ह्यातील लघू प्रकल्पांचीही स्थिती समाधानकारक नसून, ९० लघू प्रकल्पांत केवळ ५७ टक्‍केच उपयुक्‍त पाणीसाठा झाला आहे.
२०१६ मध्ये ऑक्‍टोबरअखेर मराठवाड्यातील ७४३ लघू प्रकल्पांत ८४ टक्‍के उपयुक्‍त पाणी होते. ते आता ५६ टक्‍केच आहे. दुसरीकडे ऑक्‍टोबरअखेरच मराठवाड्यातील ७५ मध्यम प्रकल्पांतही ८३ टक्‍के उपयुक्‍त पाणीसाठा होता, तो यंदा ६८ टक्‍क्‍यांवरच आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.