टँकरऐवजी पाइपलाइनने पाणीपुरवठा करा : पाटील

टँकरऐवजी पाइपलाइनने पाणीपुरवठा करा : पाटील
टँकरऐवजी पाइपलाइनने पाणीपुरवठा करा : पाटील

नागपूर : अपुऱ्या व अनियमित पावसामुळे जिल्ह्यातील ७१८ गावांमध्ये दुष्काळी परिस्थिती निर्माण झाली आहे. या गावांमध्ये टॅंकरद्वारे पाणीपुरवठा न करता नागरिकांच्या घरापर्यंत पाइपलाइनद्वारे पाणीपुरवठा करावा, असे निर्देश महसूलमंत्री चंद्रकांत पाटील यांनी दिले.

नागपूर जिल्ह्यातील दुष्काळग्रस्त गावांसाठी राबविण्यात येणाऱ्या उपाययोजनांचा महसूलमंत्री पाटील यांनी रविभवन येथे वरिष्ठ अधिकाऱ्यांच्या बैठकीत आढावा घेतला. या वेळी पालकमंत्री चंद्रशेखर बावनकुळे, विभागीय आयुक्त डॉ. संजीव कुमार, जिल्हाधिकारी अश्विन मुदगल उपस्थित होते.

जिल्ह्यात ४० दिवसांत सरासरी ८६.७४ टक्के पाऊस झाला. काटोल व कळमेश्वर या तालुक्यात गंभीर स्वरूपाचा, तर नरखेड तालुक्यात मध्यम स्वरूपाचा दुष्काळ आहे. जिल्ह्यातील इतर ८ महसूल मंडळांतील २६८ गावांचाही यामध्ये समावेश आहे. जिल्ह्यातील सरासरी ६७ टक्के गावांमध्ये निकषानुसार आवश्यक उपाययोजना तात्काळ लागू करण्यात येत आहेत. दुष्काळग्रस्त गावांमध्ये समावेश नसलेल्या गावासंदर्भात जिल्हाधिकारी व विभागीय आयुक्त यांना निकष व क्षेत्रभेटीच्या आधारे गावे दुष्काळग्रस्त जाहीर करण्याचा अधिकार देण्यात आला आहे, असे पाटील म्हणाले.

जनावरांना पिण्याचे पाणी, चारा पुरविण्याला प्राधान्य आहे. पिण्याचे पाणी पुरविणाऱ्या नादुरुस्त व पूरक नळयोजनांच्या दुरुस्तीची कामे पूर्ण करता यावी, यासाठी निविदा प्रक्रियेचा कालावधी कमी केला. त्यामुळे येत्या फेब्रुवारीपासून अशा गावांमध्ये पिण्याच्या पाण्याचा पुरवठा सुरळीत होईल, या दृष्टीने नियोजन करावे. शून्य टॅंकर धोरण राबवावे. महात्मा गांधी राष्ट्रीय ग्रामीण हमी योजनेंतर्गत प्रत्येक गावात कामांचे नियोजन करावे. यामध्ये गावातील पांदण रस्त्यांची कामे पूर्ण करावीत. सर्व शाळांना संरक्षक भिंत बांधण्याचे कामदेखील तात्काळ पूर्ण करावे, अशा सूचना त्यांनी दिल्या.

छत्रपती शिवाजी महाराज शेतकरी सन्मान योजनेंतर्गत जिल्ह्यात ६७ हजार ७३६ खातेदारांना ४२० कोटी ९ लाख रुपयांची कर्जमाफी देण्यात आली. लाभार्थ्यांना कर्जमाफीसंदर्भातील माहितीपत्र द्यावे. त्यांना सातबारा प्रमाणपत्रेदेखील घरपोच द्यावीत. बोंडअळीच्या नुकसानभरपाईची रक्कम उपलब्ध करून देण्यात आली आहे. खरीप पीककर्ज वाटपामध्ये राष्ट्रीयीकृत व जिल्हा बॅंकांद्वारे ५९२ कोटी ३२ लाख रुपयांचे कर्ज वाटप करण्यात आले. कर्ज न घेणाऱ्या शेतकऱ्यांशी चर्चा करून त्यासंदर्भातील अहवाल सादर करण्याच्या सूचना महसूलमंत्री पाटील यांनी दिल्या.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com