खानदेशात उष्णतेचा कहर; पावसाची प्रतीक्षा कायम

जळगाव  ः खानदेशात वादळी पाऊस वगळता कुठेही दमदार किंवा पूर्वमशागत योग्य पूर्वमोसमी पाऊस झालेला नाही. शिवार पेरणीसाठी तयार आहे. परंतु, पावसाचे कुठलेही संकेत, वातावरण नसल्याने शेतकरीराजा चिंताग्रस्त झाला आहे.  मागील वर्षी जूनच्या पहिल्या आठवड्यात पावसाने हजेरी लावली होती. नंतर पावसाने हूल दिली होती. या वर्षी मात्र एकदाही पाऊस झालेला नाही. १ ते ११ जूनदरम्यान खानदेशात धुळे, साक्री, शिंदखेडा, जळगाव जिल्ह्यांतील चोपडा, जळगाव, यावल, पाचोरा, भडगाव, जामनेर, मुक्ताईनगर, रावेर या भागांत वादळी पाऊस झाला. यात वादळ अधिक व पाऊस मध्यम स्वरूपाचा होता. शिवाराला या पावसाचा फारसा लाभ झाला नाही. तसेच मे महिन्यात कमाल तापमान ४८ अंश सेल्सिअसपर्यंत पोचले होते. सुमारे १२ दिवस कमाल तापमान ४५ अंश सेल्सिअसपेक्षा अधिक होते. तर जूनमध्येदेखील १० दिवस कमाल तापमान ४२ अंश सेल्सिअसपर्यंत आहे. अतिउष्णतेमुळे केळी व भाजीपाला, पपई पिकाला फटका बसण्याचे सत्र कायम आहे. दमदार पाऊस झाला असता दर पिकांच्या सिंचनाची फारशी गरज राहिली नसती. तसेच पेरणीपूर्व मशागत सुरू झाली असती. परंतु, दमदार पाऊस न झाल्याने शेतशिवार उजाड दिसत आहे. शेतकऱ्यांनी ट्रॅक्‍टरच्या साह्याने नांगरणी, शेत भुसभुशीत करण्याचे काम उरकून घेतले आहे. पावसाचे कोणतेही वातावरण नसल्याने बियाण्याची खरेदी मात्र शेतकरी करीत नसल्याची स्थिती आहे. कारण पावसावरच पेरणीचे गणित अवलंबून आहे. कापूस लागवड १० जुलैपूर्वी झाल्यास पीक बऱ्यापैकी येते. सोयाबीनची पेरणीदेखील १५ जुलैपर्यंत करायची असते. खानदेशात या हंगामात सुमारे आठ लाख हेक्‍टरवर कापूस लागवड अपेक्षित आहे. पाऊस जसजसा लांबणीवर पडेल, तसे पेरणीचे गणितही बदलेल.  बाजारात बियाणे मुबलक आहे, परंतु खरेदी कुठेही सुरू नाही. कमाल शेती कोरडवाहू असल्याने बियाणे बाजारातील उलाढाल जवळपास ठप्प असल्याचे विक्रेत्यांचे म्हणणे आहे.