नांदेडमध्ये फळपिकांसाठी हवामानावर आधारित पीकविमा

नांदेड ः पंतप्रधान पीक विमा योजने अंतर्गत राज्यात पुनर्रचित हवामानावर आधारित फळ पीक विमा योजना अंबिया बहाराकरिता लागू करण्यात आली आहे. नांदेड जिल्ह्यातील केळी, मोसंबी, आंबा, द्राक्षे या पिकांचा या योजनेअंतर्गंत समावेश आहे. भारतीय कृषी पीक विमा कंपनी मार्फत जिल्ह्यातील अधिसूचित ४७ मंडळामध्ये ही योजना राबविण्यात येत आहे.

जिल्ह्यातील शेतकऱ्यांना केळी, मोसंबी या पिकांसाठी ३१ आॅक्टोबर पर्यंत, द्राक्षासाठी १५ आॅक्टोबर पर्यंत आणि आंबा पिकासाठी ३१ डिसेंबर पर्यंत विमा प्रस्ताव सादर करता येणार आहेत. या संदर्भात कृषी विभागाच्या सूत्रांनी माहिती दिली.

हवामानावर आधारित फळपिक विमा योजना अधिसूचित पिकांसाठी कर्जदार शेतकऱ्यांसाठी अनिवार्य आहे. मात्र, बिगर कर्जदार शेतकऱ्यांना ऐच्छिक आहे.हवामानावर आधारित फळपिक विमा अांबिया बहारामध्ये विहित मुदतीमध्ये विमा प्रस्ताव सादर करुन जास्तीत जास्त संख्येने शेतकऱ्यांनी योजनेत सहभागी व्हावे. विमा हप्ता तसेच अधिक माहितीसाठी तालुका कृषी अधिकारी कार्यालय, नजीकच्या बँकेशी तसेच संबंधित विमा कंपनीशी संपर्क साधावा, असे आवाहन कृषी विभागामार्फत आले आहे.

फळपीक विमा योजनेत समाविष्ट अधिसूचित फळपीक, तालुका निहाय मंडळांची संख्या

केळी - नांदेड तालुका ः तरोडा बु., तुप्पा, वसरणी, लिंबगाव, विष्णुपुरी. अर्धापूर तालुका ः अर्धापूर, दाभड, मालेगाव. मुदखेड तालुका ः मुदखेड, मुगट, बारड.हदगाव तालुका ः हदगाव, तामसा, मनाठा, आष्टी. लोहा तालुका ः शेवडी बा. भोकर तालुका ः भोकर. देगलूर तालुका ः मरखेल, हाणेगाव. किनवट तालुका ःकिनवट, बोधडी.

मोसंबी- नांदेड तालुका ःलिंबगाव, विष्णूपुरी. मुदखेड तालुका ः बारड. अर्धापूर तालुका ः मालेगाव.

आंबा -अर्धापूर तालुका ः मालेगाव, दाभड.मुखेड तालुका ः मुक्रमाबाद.

द्राक्षे - नांदेड तालुका ः तरोडा बु., तुप्पा, वसरणी, लिंबगांव, विष्णुपूरी. अर्धापूर तालुका ः अर्धापूर, दाभड, मालेगाव, मुदखेड तालुका ः मुदखेड, मुगट, बारड, हदगाव तालुका ः हदगाव, तामसा, मनाठा, आष्टी. लोहा तालुका ः शेवडी बा.भोकर तालुका ः भोकर. देगलूर तालुका ः मरखेल, हाणेगाव.