मध्य महाराष्ट्रात उद्या तुरळक ठिकाणी पावसाची शक्यता

पुणे : मध्य महाराष्ट्र ते कर्नाटकचा दक्षिण भाग या दरम्यान कमी दाबाचे क्षेत्र तयार झाले आहे. आज या क्षेत्राची तीव्रता अधिक होण्याची शक्यता आहे. उद्या (शनिवार) मध्य महाराष्ट्रात, रविवारी (ता. २५) कोकण, गोवा व मध्य महाराष्ट्रात तुरळक ठिकाणी मेघगर्जनेसह पाऊस पडण्याची शक्यता आहे. सोमवारपासून (ता. २६) राज्यात कोरडे हवामान राहणार असल्याचे हवामान विभागाच्या सूत्रांनी सांगितले.  बिहार ते तमिळनाडू या भागात कमी दाबाचे क्षेत्र आहे. हे क्षेत्र पश्चिमेकडे हळूहळू सरकत असून, ते उत्तर प्रदेशचा आग्नेय भाग, मध्य प्रदेशचा पूर्व भाग, विदर्भ, तेलंगण आणि रायलसीमाच्या भागात दाखल होण्याची शक्यता आहे. त्यामुळे विदर्भातील कमाल तापमानात अंशतः बदल होण्याची शक्यता आहे. तसेच, छत्तीसगडच्या उत्तर भागात चक्राकार वाऱ्याची स्थिती तयार झाली आहे. त्याचा परिणाम राज्यातील हवामानावर होत असून, कमाल तापमानात अंशतः चढ-उतार होत आहे. मराठवाडा व विदर्भात उन्हाची तीव्रता वाढू लागल्याने कमाल तापमानाचा पारा सरासरीच्या तुलनेत दोन ते तीन अंश सेल्सिअसने वाढला आहे. गुरुवारी (ता. २२) सकाळी आठ वाजेपर्यंत विदर्भातील ब्रह्मपुरी येथे ३९.७ अंश सेल्सिअस सर्वाधिक कमाल तापमानाची नोंद झाली. नागपूर, वर्धा, चंद्रपूर येथील कमाल तापमान ३९.० अंश सेल्सिअसच्या दरम्यान होते. पुढील दोन दिवस मराठवाडा व विदर्भात कोरडे हवामान राहणार असून कोकण, मध्य महाराष्ट्रात हवामान ढगाळ राहून तुरळक ठिकाणी मेघगर्जनेसह पाऊस पडेल.   विदर्भानंतर कोकणातील भिरा येथे ३९.५ अंश सेल्सिअस कमाल तापमानाची नोंद झाली आहे. मुंबई, अलिबाग, रत्नागिरी, डहाणू येथील कमाल तापमान ३० ते ३२ अंश सेल्सिअसच्या दरम्यान होते. मध्य महाराष्ट्रात उन्हाचा चटका वाढल्याने कमाल तापमान ३८.० अंश सेल्सिअसपर्यंत पोचले आहे. नगरमध्ये ३८.२ अंश सेल्सिअस सर्वाधिक कमाल तापमानाची नोंद झाली. मराठवाड्यातही उन्हाचा चांगलाच पारा वाढला आहे. परभणी येथे ३८.० अंश सेल्सिअस एवढे कमाल तापमान नोंदविले गेले.    गुरुवारी (ता. २२) सकाळी आठ वाजेपर्यंत नोंद झालेले कमाल तापमान (अंश सेल्सिअसमध्ये) ः मुंबई ३१.६, सांताक्रूझ ३२.०, अलिबाग ३०.७, रत्नागिरी ३३.७, डहाणू ३२.३, भिरा ३९.५, पुणे ३५.२, नगर ३८.२, जळगाव ३७.०, कोल्हापूर ३५.४, महाबळेश्वर ३०.७, मालेगाव ३७.२, नाशिक ३३.८, सांगली ३६.४, सातारा ३५.३, सोलापूर ३८.१, उस्मानाबाद ३६.२, औरंगाबाद ३५.७, परभणी ३८.०, नांदेड ३८.५, अकोला ३८.४, अमरावती ३७.८, बुलडाणा ३५.५, ब्रह्मपुरी ३९.७, चंद्रपूर ३९.४, गोंदिया ३७.०, नागपूर ३९.१, वाशीम ३८.०, वर्धा ३९.५, यवतमाळ ३८.०