थंडी कमी होण्यास सुरवात

पुणे : कोरड्या हवामानामुळे हवेतील आर्द्रता कमी होऊ लागली आहे. त्यामुळे किमान तापमानात हळूहळू वाढ होत आहे. विदर्भातील काही भागात थंडी असली तरी, किमान तापमानाचा पारा दहा अंश सेल्सिअसपर्यंत असल्याचे हवामान विभागाच्या सूत्रांनी सांगितले. गेल्या काही दिवसांपासून दक्षिणेकडे असलेला सूर्य उत्तरेकडे सरकू लागला आहे. त्यामुळे किमान तापमानात वाढ होऊ लागली आहे. कोकण, मध्य महाराष्ट्र आणि मराठवाड्यातील किमान तापमानात सरासरीच्या तुलनेत सहा अंश सेल्सिअसपर्यंत वाढ झाली आहे. विदर्भातील बहुतांशी भागातील किमान तापमान सरासरी एवढे, तर काही शहरांचे किमान तापमान सरासरीच्या तुलनेत चार अंशापर्यंत घटले होते. येत्या मंगळवारपर्यंत (ता.१६) गोव्यासह संपूर्ण राज्यात हवामान कोरडे राहण्याची शक्यता आहे. पुणे परिसरात बुधवारपर्यंत (ता.१७) आकाश मुख्यत निरभ्र राहील.  कोकणातील किमान तापमानात सरासरीच्या तुलनेत जवळपास चार अंशांपर्यंत वाढ झाली. भिरामध्ये किमान तापमानात सरासरीच्या तुलनेत चार अंश सेल्सिअसने वाढ होऊन १९.५ अंश सेल्सिअस किमान तापमानाची नोंद झाली. मध्य महाराष्ट्रातही किमान तापमानात सरासरीच्या तुलनेत सहा अंशांपर्यंत वाढ झाली आहे. जळगाव येथील किमान तापमान सरासरीएवढे होते.  मराठवाड्यातील औरंगाबाद येथील किमान तापमानात सरासरीच्या तुलनेत तीन अंशांनी वाढ झाली. उस्मानाबाद, नांदेड येथील किमान तापमान सरासरीएवढे होते. परभणी येथील किमान तापमानात सरासरीच्या तुलनेत एक अंश सेल्सिअसने घटले होते. परभणीतील कृषी विद्यापीठाच्या परिसरात ११.६ अंश सेल्सिअसची सर्वांत कमी किमान तापमानाची नोंद झाली. विदर्भातील अकोला, वर्धा, अमरावती येथील किमान तापमान सरासरीएवढे होते. चंद्रपूर, गोंदिया, नागपूर, यवतमाळ येथील किमान तापमानात सरासरीच्या तुलनेत २ ते ४ अंशांनी घटले होते.  शुक्रवारी (ता.१२) सकाळी आठ वाजेपर्यंतचे किमान तापमान व कंसात झालेली घट (अंश सेल्सिअस) : मुंबई (सांताक्रूझ) २०.२ (३), अलिबाग २०.५ (३), रत्नागिरी २१.७ (३), भिरा १९.५ (४), डहाणू २०.८ (४), नगर १४.० (२), पुणे १५.५ (५), जळगाव ११.६, कोल्हापूर २१.२ (६), महाबळेश्वर १६.४ (३), मालेगाव १४.० (३), नाशिक १२.८ (३), सांगली १९.६ (६), सातारा १८.० (५), सोलापूर १८.० (२), औरंगाबाद १४.२ (३), उस्मानाबाद १२.७,  परभणी (कृषी विद्यापीठ आवार) ११.६, परभणी शहर १३.४ (-१), नांदेड १३.५, अकोला १४.१,  अमरावती १४.१, बुलडाणा १५.२ (१), चंद्रपूर १०.८ (-४), गोंदिया ९.४ (-२), नागपूर ११.० (-२), वर्धा १३.८, यवतमाळ १३.४ (-२)