मध्य महाराष्ट्रात आजपासून गारपिटीचा अंदाज 

नगर, नाशिक, धुळे, नंदुरबार, जळगावला सावधानतेचा इशारा पुणे (प्रतिनिधी)ः लक्षद्वीप परिसर ते मध्य महाराष्ट्राचा उत्तर भाग या दरम्यान कमी दाबाचे क्षेत्र तयार झाले आहे. हे क्षेत्र कर्नाटक आणि कोकणचा दक्षिण भागातही दाखल होण्याची शक्यता आहे. त्यामुळे आजपासून (ता.२३) मध्य महाराष्ट्राच्या नगर, नाशिक, धुळे, नंदुरबार, जळगाव जिल्ह्याच्या काही भागांत गारपीट होण्याचा अंदाज हवामान विभागाच्या सूत्रांनी वर्तविला. 

कोकणात समुद्रसपाटीपासून नऊशे मीटर उंचीवर चक्राकार वाऱ्याची स्थिती तयार झाली आहे. बंगालचा उपसागर आणि दक्षिण तमिळनाडू श्रीलंका भागातही चक्राकार वाऱ्याची स्थिती तयार झाली आहे. लक्षद्वीप परिसर ते अरबी समुद्र दक्षिण महाराष्ट्रातही कमी दाबाचे क्षेत्र तयार झाले आहे. हे क्षेत्र लक्षद्वीपकडून गुजरातच्या दिशेने सरकत आहे. बांगलादेशाच्या परिसरातही चक्राकार वाऱ्याची स्थिती तयार झाली आहे. 

उद्या (ता. २४) मध्य महाराष्ट्र, मराठवाडा व विदर्भात तुरळक ठिकाणी पाऊस पडण्याची शक्यता आहे. उत्तर मध्य महाराष्ट्रातील धुळे, जळगाव, नाशिक, नगर, मराठवाड्यातील औरंगाबाद व विदर्भातील अकोला, बुलडाणा जिल्ह्यातील काही भागात मेघगर्जनेसह गारपीट होण्याची शक्यता आहे. राज्याच्या उर्वरित भागात हवामान कोरडे राहील. रविवारी (ता.२५) मध्य महाराष्ट्रात तुरळक ठिकाणी पाऊस पडण्याची शक्यता आहे. राज्याच्या उर्वरित भागात हवामान कोरडे राहण्याची शक्यता आहे. सोमवार (ता.२६) पासून गोव्यासह संपूर्ण राज्यात हवामान कोरडे राहण्याची शक्यता आहे. 

कोकण, मध्य महाराष्ट्र, मराठवाडा व विदर्भातील अनेक भागात सकाळी दहा वाजल्यापासून उन्हाच्या झळा वाढू लागल्या आहेत. त्यामुळे वातावरणात चांगलाच उकाडा वाढत असून किमान तापमानात सरासरीच्या तुलनेत चार अंश सेल्सिअसपर्यत वाढ झाली आहे. गुरुवारी (ता. २२) सकाळी आठ वाजेपर्यत मध्य महाराष्ट्रातील निफाड येथे ११.४ अंश सेल्सिअसची सर्वांत कमी किमान तापमानाची नोंद झाली.  बुधवारी (ता. २१) सकाळी आठ वाजेपर्यतचे किमान तापमान व कंसात झालेली घट (अंश सेल्सिअस) : मुंबई (सांताक्रूझ) १९.६ (१), अलिबाग २०.८ (२), रत्नागिरी २०.४ (१), भिरा १८.० (२), डहाणू २०.० (१), पुणे १४.५ (२), नगर १४.५, जळगाव १३.६ (-१), कोल्हापूर २०.० (३), महाबळेश्वर १७.२ (३), नाशिक १४.३ (२), निफाड ११.४, सांगली १९.१ (३), सातारा १६.१ (१), सोलापूर २०.२ (२), औरंगाबाद १७.६ (३), बीड १६.४ (१), उस्मानाबाद १५.३, परभणी शहर १७.५, नांदेड २०.० (४), अकोला १९.६ (३), अमरावती १९.४ (१), बुलडाणा १९.० (२), चंद्रपूर २१.० (४), गोंदिया १४.५ (-२), नागपूर १४.७ (-१), वर्धा १६.२, यवतमाळ १८.४ (१).