राज्यातील काही भागांत जोरदार पावसाचा अंदाज

पुणे : येत्या काही दिवसांत परतीचा पाऊस राज्यात दाखल होण्याची शक्यता असली, तरी सध्या राज्यातील हवामानात कधी ऊन, सावली, ढगाळ हवामान होत अचानक विजांचा कडकडाट व मेघगर्जनेचा पाऊस पडत आहे. रविवारी (ता. ८) अमरावती, अकोला, बुलडाणा आणि कोल्हापूर जिल्ह्यातील काही ठिकाणी पावसाने जोरदार हजेरी लावली.

सध्या राज्यातील बहुतांशी भागात हवेचे दाब कमी झाले असून, आर्द्रतेत वाढ झाली आहे. त्यामुळे येत्या बुधवार (ता. ११) पर्यंत कोकण, गोव्यात तुरळक ठिकाणी मुसळधार पाऊस पडण्याची शक्यता आहे. गुरवार (ता. १२) पर्यंत कोकण, गोव्यात अनेक ठिकाणी, मध्य महाराष्ट्रात बऱ्याच ठिकाणी, तर मराठवाडा व विदर्भात काही ठिकाणी हलका पाऊस पडेल. पुणे परिसरातही येत्या शनिवारपर्यंत काही ठिकाणी मेघगर्जनेसह पाऊस पडण्याची शक्यता आहे.

परतीच्या पावसामुळे उत्तरेकडून दक्षिणेकडे वारे वाहत आहेत, तर सूर्यकिरणे तिरपी पडत आहेत. त्यामुळे दक्षिण भारतात कमाल तापमानात वाढ होत आहे. गेल्या दोन ते चार दिवसांपूर्वी वाढ झालेल्या कमाल तापमानात सरासरीच्या तुलनेत एक ते दोन अंश सेल्सिअसने घट झाली आहे.

त्यामुळे विदर्भातील अकोला येथे ३५.५ अंश सेल्सिअस कमाल तापमान नोंदविले गेले, तर महाबळेश्वर येथे १७.६ अंश सेल्सिअस किमान तापमानाची नोंद झाली. रविवारी (ता. ८) कोकण, मध्य महाराष्ट्रात ढगाळ हवामान होते. त्यामुळे सकाळपासून उकाडा वाढला होता. मराठवाडा व विदर्भात सकाळपासून अनेक भागांत कडक ऊन पडल्यामुळे कमाल तापमानात चांगलीच वाढ झाली होती.

राज्यातील प्रमुख शहरांचे कमाल तापमान (अंश सेल्सिअसमध्ये) पुणे 31.8, जळगाव 35.4, कोल्हापूर 29.8, महाबळेश्वर 25.1,मालेगाव 35.4, नाशिक 32.1, सांगली 30.2, सातारा 28.6, सोलापूर 33.9, मुंबई 32.0, सांताक्रुझ 33.6, अलिबाग 30.8, रत्नागिरी 31.7, औरंगाबाद 33.4, परभणी 33.8, बीड 34.0, अकोला 35.5, अमरावती 31.6, बुलडाणा 32.5, चंद्रपूर 31.6, गोंदिया 31.8, नागपूर 33.8, वाशीम 34.0, वर्धा 32.4, यवतमाळ 32.0.