पावसाचा आजही अंदाज

पुणे : मध्य प्रदेश, उत्तर प्रदेश आणि गुजरातच्या परिसरात परतीचा पाऊस दाखल आहे. बंगालच्या उपसागरात हवेचे कमी दाबाचे क्षेत्र तयार झाले. त्यामुळे शुक्रवारी (ता. १३) पुणे, अकोला, परभणी शहरात जोरदार पाऊस पडला. कोकण, मध्य महाराष्ट्राच्या काही भागांत ढगाळ होते. मध्य महाराष्ट्राचा पूर्वेकडील भाग, मराठवाडा व विदर्भात अनेक ठिकाणी ऊन पडले होते. शनिवारी (ता. १४) कोकण, गोवा व मध्य महाराष्ट्रात काही ठिकाणी, तर मराठवाडा व विदर्भात तुरळक ठिकाणी हलका पाऊस पडण्याचा अंदाज आहे.

मध्य पूर्व व लगतच्या आग्नेय अरबी समुद्रापासून मध्य महाराष्ट्र, मराठवाडा आणि विदर्भापर्यंत असलेली द्रोणीय स्थिती विरून गेली आहे. तरी राज्यात काही भागांत पुढील दहा ते पंधरा दिवस पावसाच्या अधूनमधून जोरदार सरी बरी बरसतील. काही ठिकाणी विजांचा कडकडाट मेघगर्जनेचा पाऊस पडण्याची शक्यता आहे. येत्या सोमवार (ता. १६)पर्यंत कोकण, गोव्यासह संपूर्ण राज्यात हवामान कोरडे राहण्याची शक्यता आहे. पुणे परिसरातही काही ठिकाणी मेघगर्जनेसह जोरदार पाऊस पडेल, अशी माहिती हवामान विभागाच्या सूत्रांनी दिली.

सध्या राज्यातील बहुतांशी भागातील हवामान कोरडे असून, हवेतील बाष्प कमी होत आहे. त्यामुळे सकाळपासून कडक ऊन पडत आहे. परिणामी हवामानात चांगलाच उकाडा वाढत आहे. राज्यातील जळगाव येथे शुक्रवारी सकाळपर्यंत ३४.४ अंश सेल्सिअस कमाल तापमान होते. मध्य महाराष्ट्रात ढगाळ हवामानामुळे कमाल तापमानात सरीसरीपर्यंत म्हणजेच २५ ते ३४ अंश सेल्सिअस दरम्यान होते.

कोकणातील कमाल तापमान ३१ ते ३३ अंश सेल्सिअसदरम्यान होते. मराठवाड्यातील कमाल तापमान ३० ते ३२ अंश सेल्सिअस, विदर्भातील कमाल तापमान २८ ते ३३ अंश सेल्सिअस या दरम्यान होते. तर उस्मानाबाद येथे१७.२ अंश सेल्सिअस एवढे किमान तापमान होते. राज्यातील शहरनिहाय कमाल तापमान (अंश सेल्सिअसमध्ये) पुणे ३१.१, नगर ३२.०, जळगाव ३४.४, कोल्हापूर ३१.३, महाबळेश्वर २५.१, मालेगाव ३३.०, नाशिक ३१.४, सांगली ३१.५, सातारा ३०.६, सोलापूर ३३.१, सांताक्रूझ ३३.३, अलिबाग ३१.८, रत्नागिरी ३२.८, डहाणू ३३.४, उस्मानाबाद ३०.९, औरंगाबाद ३१.०, परभणी ३२.१, अकोला ३३.९, अमरावती २८.२ बुलडाणा ३०.०, चंद्रपूर ३२.८, गोंदिया ३३.५, नागपूर ३३.२, वर्धा ३३.०, यवतमाळ ३१.०.