गोंदिया 11.5 अंशांवर

पुणे : उत्तरेकडून थंड वारे वाहू लागले आहेत. याचा वेग काही प्रमाणात थोडा वाढला आहे. त्यामुळे महाराष्ट्रात थंडी वाढू लागली असून, अनेक भागांत धुक्‍याची परिस्थिती तयार होत आहे. शुक्रवारी (ता. 15) सकाळी आठ वाजेपर्यंत गोंदिया येथे 11.5 अंश सेल्सिअस किमान तापमानाची नोंद झाल्याचे हवामान विभागाच्या सूत्रांनी सांगितले.

सध्या मध्य महाराष्ट्राती काही भागात चक्राकार वाऱ्याची स्थिती आहे. ही स्थिती समुद्रसपाटीपासून नऊशे मीटर उंचीवर आहे. त्यामुळे मध्य महाराष्ट्रातील काही जिल्ह्यांत वातावरण ढगाळ आहे. परिणामी, किमान तापमानात काही प्रमाणात चढउतार सुरू आहे. महाराष्ट्राचा मध्य भागातील आडवा पट्टा भाग वगळता वरील व खालील भागात बाष्प जास्त आहे. त्यामुळे या भागात धुक्‍याचे प्रमाण जास्त जाणवत आहे. तसेच मुंबई तसेच किनारपट्टीवरील भागात बाष्प जास्त असल्यामुळे व हिमालयातील थंड वारे वाहून येत असल्यामुळे किनारपट्टी भागातसुद्धा धुक्‍याचे प्रमाण आहे. महाराष्ट्रातील सर्व जिल्ह्यांत धुके कमी-जास्त प्रमाणात आहे. उर्वरित महाराष्ट्रात सकाळी उशिरापर्यंत धुके असणार आहे.

येते काही दिवस हवामान पूर्णपणे निरभ्र राहणार असून, पावसाची कुठेही शक्‍यता नाही. परंतु दुपारी उन्हाची तीव्रताही वाढेल. वातावरण पूर्णपणे सामान्य असून, फक्त काही भागांत वाऱ्याचा वेग काही अंशी वाढलेला दिसेल. उत्तर भारतामध्ये पाण्याची वाफ व ढग जमा झाल्यामुळे वातावरण सध्या तिकडे खराब आहे. त्यात थंडी असल्यामुळे उत्तर भारतात दाट धुके व हिमकण पडल्याचे जाणवत आहे. पुढील दोन-तीन दिवसांमध्ये थंडी व बऱ्यापैकी धुके असे वातावरण असणार आहे

शुक्रवारी (ता. 15) सकाळी आठ वाजेपर्यंतचे किमान तापमान व कंसात झालेली घट (अंश सेल्सिअस) मुंबई (सांताक्रूझ) 17.4 (-1), अलिबाग 19.0, रत्नागिरी 19.5 (-1), डहाणू 19.5 (1), भिरा 17.5 (-1), नगर 14.7 (3), पुणे 14.6 (3), जळगाव 14.8 (3), कोल्हापूर 19.0 (3), महाबळेश्वर 15.7 (2), मालेगाव 15.2 (4), नाशिक 13.0 (3), सांगली 17.2 (3), सातारा 14.5 (1), सोलापूर 16.1 (1), औरंगाबाद 16.2 (5), बीड 16.0 (4), परभणी 17.0 (4), नांदेड 18.0 (6), उस्मानाबाद 13.0, अकोला 19.4 (6), अमरावती 16.4 (1), बुलडाणा 18.0 (3), चंद्रपूर 16.8 (4), गोंदिया 11.5 (-1), नागपूर 14.6 (2), वाशीम 15.4, वर्धा 15.5 (2), यवतमाळ 20.0 (5)