तापमान पुन्हा वाढू लागले

पुणे : गेल्या काही दिवसांपासून राज्यातील बहुतांशी ठिकाणी मेघगर्जनेस पाऊस पडला. रविवारी (ता.15) खान्देश आणि विदर्भातील काही भागातून परतल्याने परतीच्या पावसाचा जोर काही प्रमाणात ओसरला आहे. सोमवारी (ता. 16) सकाळपासून उकाडा वाढला होता. परिणामी तापमान पुन्हा वाढायला सुरवात झाली असल्याचे हवामान विभागाच्या सूत्रांनी सांगितले.

सध्या राज्यातील काही काही भागात हवेचे दाब वाढत असल्यामुळे कमाल तापमानात वाढू लागले आहे. सोमवारी (ता. 16) सकाळपर्यंत विदर्भातील अकोला येथे 35.7 अंश सेल्सिअस एवढे कमाल तापमान होते. कोकण, मध्य महाराष्ट्रातील पश्‍चिम भागात सकाळपासून ऊन व सावलीचा खेळ सुरू होता. त्यामुळे हवामानात सकाळपासून चांगलाच उकाडा तयार झाला होता. परिणामी कमाल तापमानातही वाढ झाली. मध्य महाराष्ट्राचा पूर्व भाग, खान्देश, मराठवाडा आणि विदर्भात कडक ऊन पडले होते. काही ठिकाणी अधूनमधून ढगाळ हवामान होत होते. त्यामुळे या भागातही चांगलाच उकाडा तयार झाला होता. त्यामुळे राज्यातील बहुतांशी भागातील कमाल तापमानात एक ते दोन अंश सेल्सिअसने वाढ झाली.

परतीचा पाऊस माघारी गेल्यामुळे काही भागात हलका ते मध्यम स्वरूपाचा पाऊस पडत आहे. सोमवारी (ता.16) सकाळी आठ वाजेपर्यंत मध्य महाराष्ट्रातील काही ठिकाणी जोरदार पाऊस पडला. कोकण, गोव्यात बऱ्याच ठिकाणी हलका ते मध्यम स्वरूपाचा, मध्य महाराष्ट्रात काही ठिकाणी तर मराठवाडा व विदर्भात तुरळक ठिकाणी हलक्‍या स्वरूपाच्या सरी बरसल्या. मध्य महाष्ट्रातील कवठेमहाकाळ येथे सर्वाधिक 120 मिलिमीटर पाऊस पडल्याची नोंद झाली असून शिरोळ, जाट, खंडाळा, बावडा या भागात अतिवृष्टी झाली. कोकणातील रोहा, कणकवली, पेण, वेंगुर्ला, विक्रमगड येथेही हलका ते मध्यम स्वरूपाचा पाऊस पडला. मराठवाड्यातील सोनपेठ, लोहारा, बिलोली, विदर्भातील सिंरोचा येथे हलका ते मध्यम स्वरूपाच्या सरी बरसल्या.

हवामान कोरडे राहण्याची शक्‍यता परतीच्या पावसाने रविवारी (ता.16) माघार घेतल्याने आज (मंगळवारी) आणि उद्या (बुधवारी) मध्य महाराष्ट्र, मराठवाडा व विदर्भात हवामान कोरडे राहण्याची शक्‍यता आहे. त्यामुळे हवामानात उकाडा वाढून पुन्हा ऑक्‍टोबर हीट वाढण्याचा अंदाज आहे. गुरुवारी व शुक्रवारी गोव्यासह संपूर्ण राज्यात काही ठिकाणी पावसाच्या हलक्‍या सरी बरसण्याची शक्‍यता आहे. पुणे परिसरातही आकाश अंशतः ढगाळ राहणार असून, काही ठिकाणी मेघगर्जनेसह जोरदार पाऊस पडण्याचा अंदाज हवामान विभागाच्या सूत्रांनी वर्तविला.

सोमवारी (ता.16) सकाळी आठवाजेपर्यंत झालेला पाऊस (मिलिमीटरमध्ये) कोकण ः रोहा 50, कणकवली, पेण, वेंगुर्ला, विक्रमगड 30, लांजा, संगमेश्वरदेवरुख 20, दापोली, देगवड, जव्हार, कुडाळ, मालवण, मंडणगड, मोखाडा, मुंबई, मुरबाड, राजपूर, सावंतवाडी, सुधागडपाली, वैभववाडी, वाडा 10 मध्य महाराष्ट्र ः कवठे महाकाळ 120, शइरोळ 70, जाट, खंडाळा, बावडा 60, महाबळेश्वर, दहीवडी, गगनबावडा, मुळशी, फलटन, सोलापूर, विटा 40, मोहोळ, शिरूर, इस्लामपूर 30, आटपाडी, कागल, खटाव, वडूज, माळशिरस, सांगली, श्रीगोंदा, सुरगाणा 20, केडगाव, कोल्हापूर, कोरेगाव, माढा, ओझरखेडा, पन्हाळा, राधानगरी, शाहूवाडी, तासगाव, वडगावमावळ, वेल्हा 10 मराठवाडा ः सोनपेठ 30, लोहारा 20, बिलोली, माजलगाव, मुदखेडा, पूर्णा, तुळजापूर, उमरगा 10 विदर्भ ः सिंरोजा 10 सोमवारी (ता.16) राज्यातील शहरनिहाय कमाल तापमान (अंश सेल्सिअसमध्ये) पुणे 31.3, जळगाव 35.6, कोल्हापूर 31.1, मालेगाव 32.5, नाशिक 32.1, सांगली 31.2, सातारा 30.1, मुंबई 31.5, सांताक्रूझ 32.2, रत्नागिरी 31.5, डहाणू 32.5, औरंगाबाद 32.4, परभणी 33.5, अकोला 35.7, अमरावती 32.2, बुलडाणा 32.0, चंद्रपूर 35.0, गोंदिया 34.2, नागपूर 34.8, वर्धा 35.0, यवतमाळ 34.0