उन्हाचा चटका जाणवू लागला

पुणे : उत्तरेकडील थंड वाऱ्यांचा प्रवाह कमी होऊ लागला आहे. राज्यातील थंडी कमी होऊ लागली असून, किमान तापमानाचा पारा हळूहळू वाढू लागला आहे. किमान तापमानाबरोबर कमाल तापमानाचा पाराही वाढू लागला आहे. त्यामुळे उन्हाचा चटका जाणवू लागला आहे. मध्य महाराष्ट्रातील निफाड येथे १२ अंश सेल्सिअसची सर्वांत कमी किमान तापमानाची नोंद झाली असल्याचे हवामान विभागाच्या सूत्रांनी सांगितले.

नैर्ऋत्याकडून काही प्रमाणात वारे वाहू लागले आहे. तसेच हवेतील आर्द्रता कमी होऊ लागली आहे. त्यामुळे राज्यातील किमान तापमानात चढ-उतार होत आहे. सध्या कोकणातील थंडी कमी झाली आहे. किमान तापमानात वाढ होऊ लागली आहे. मुंबई, रत्नागिरी, डहाणू येथील किमान तापमान सरासरीएवढे होते. अलिबाग, भिरा येथील किमान तापमान सरासरीच्या तुलनेत दोन अंश सेल्सिअसने वाढले. मध्य महाराष्ट्रातही थंडी गायब झाली आहे. पुणे, जळगाव, महाबळेश्वर, सांगली येथील किमान तापमान सरासरीच्या तुलनेत दोन अंश सेल्सिअसने वाढले. मालेगाव, नाशिक, निफाड, सातारा येथे किंचित थंडी आहे.

मराठवाड्यात गेल्या आठवड्यात झालेल्या गारपिटीमुळे हवेत किंचित आर्द्रता आहे. त्यामुळे मराठवाड्यातील बहुतांशी भागांत किंचित थंडी आहे. परभणी शहर, नांदेड येथील किमान तापमानात सरासरीच्या तुलनेत एक ते दोन अंश सेल्सिअसने घटले. बीडमधील तापमान सरासरीएवढे आहे. औरंगाबादमध्ये थंडी काही प्रमाणात कमी झाली आहे. विदर्भातील अनेक भागांत थंडी आहे. मात्र, येत्या काही दिवसांत ही थंडी कमी होण्याची शक्यता असून उन्हाचा पारा हळूहळू वाढेल. अकोला, अमरावती, बुलडाणा, गोंदिया, नागपूर, वर्धा येथील किमान तापमान सरासरीच्या तुलनेत एक ते तीन अंश सेल्सिअसने घटले आहे. यवतमाळमध्ये तापमान सरासरीएवढे आहे.

रविवारी (ता. १८) सकाळी आठ वाजेपर्यंतचे किमान तापमान व कंसात झालेली घट (अंश सेल्सिअस) : मुंबई (सांताक्रूझ) १७.९, अलिबाग १९.८ (२), रत्नागिरी १९.४, भिरा १७.५ (२), डहाणू १८.३, पुणे १३.७ (२), जळगाव १२.२ (२), कोल्हापूर १८.९ (३), महाबळेश्वर १६.० (२), मालेगाव १३.८ (१), नाशिक १२.३ (१), निफाड १२.०, सांगली १७.३ (२), सातारा १५.४ (१), सोलापूर १८.३, औरंगाबाद १४.४ (१), बीड १४.६, परभणी शहर १५.० (-२), नांदेड १४.० (-१), अकोला १५.५ (-१), अमरावती १६.० (-१), बुलडाणा १६.० (-१), चंद्रपूर १८.० (१), गोंदिया १३.७ (-२), नागपूर १३.४ (-३), वर्धा १५.० (-१), यवतमाळ १७.४