राज्यात किमान-कमाल तापमानात किंचित वाढ

पुणे : गेल्या दोन ते तीन दिवसांपासून कोकण, मध्य महाराष्ट्रात असलेल्या कमी दाबाच्या क्षेत्रामुळे ढगाळ हवामान होते. त्यामुळे किमान तापमानात चढ-उतार होत होता. रविवारी (ता. २५) राज्यात कोरडे हवामान झाल्याने उन्हाच्या झळा तीव्र होऊ लागल्या आहेत. किमान तापमानाबरोबर कमाल तापमानातही किंचित वाढ झाली आहे. मध्य महाराष्ट्रात सातारा येथे १५.५ अंश सेल्सिअस किमान तापमानाची नोंद झाली असल्याचे हवामान विभागाच्या सूत्रांनी सांगितले. शनिवारी (ता. २४) सायंकाळी जळगाव, औरंगाबाद आणि बुलडाणा जिल्ह्याच्या काही भागावर ढगाळ हवामान होते. त्यामुळे सायंकाळी बुलडाणा जिल्ह्यातील संग्रामपूर आणि जळगावच्या काही भागात भागात पावसाचा शिडकावा झाला. त्यामुळे कोकण, गोवा व विदर्भाच्या काही भागात किमान तापमान सरासरीच्या तुलनेत लक्षणीय वाढ झाली आहे. मध्य महाराष्ट्राच्या काही भागात किंचित वाढ झाली आहे. राज्याच्या उर्वरित भागात किमान तापमान सरासरीच्या जवळपास होते. येत्या गुरुवार (ता. १) पर्यंत गोव्यासह संपूर्ण राज्यात हवामान कोरडे राहील. पुणे परिसरातही शनिवार (ता. ३) पर्यंत आकाश मुख्यत निरभ्र राहील. कोकणातील भिरा येथे किमान तापमानाबरोबर कमाल तापमानात चार अंश सेल्सिअसने वाढ झाली आहे. त्यामुळे कमाल तापमानाचा पारा ३९.५ अंश सेल्सिअसपर्यंत पोचला आहे. मुंबई, अलिबाग, रत्नागिरी, डहाणू येथील किमान तापमानाचा पाराही सरासरीच्या तुलनेत दोन अंशाने वाढला आहे. त्यामुळे उन्हाचा चटका चांगलाच जाणवू लागला आहे. मध्य महाराष्ट्रातही बहुतांशी भागात सकाळपासून उन्हाच्या झळा वाढल्या आहेत. नागरिक दुपारी सावलीचा आधार घेऊ लागले आहे. मराठवाड्यात औरंगाबाद, नांदेड वगळता उर्वरित भागातील किमान तापमान सरासरीच्या जवळपास होते. विदर्भातील अनेक भागात कमाल तापमानाचा पारा सरासरीच्या तुलनेत तीन अंशांपर्यंत वाढला आहे. तर किमान तापमानात सरासरीच्या तुलनेत चार ते पाच अंश सेल्सिअसपर्यंत वाढ झाली आहे. परिणामी विदर्भात उन्हाची तीव्रता चांगलीच वाढू लागल्याचे दिसून येते. रविवारी (ता. २५) सकाळी आठ वाजेपर्यंतचे किमान तापमान व कंसात झालेली घट (अंश सेल्सिअस) : मुंबई (सांताक्रूझ) २०.५ (१), अलिबाग २०.६ (२), रत्नागिरी २१.५ (१), भिरा २०.५ (३), डहाणू २२.४ (२), पुणे १५.८ (२), नगर १७.५ (२), जळगाव १७.६ (२), कोल्हापूर १९.४ (१), महाबळेश्वर १७.४ (३), मालेगाव १८.६ (४), नाशिक १६.१ (३), निफाड १३.८, सांगली १९.७ (३), सातारा १५.५, सोलापूर १९.१, औरंगाबाद १७.४ (२), उस्मानाबाद १५.५, परभणी शहर १६.६ (१), नांदेड १९.० (३), अकोला २१.७ (५), अमरावती २०.२ (२), बुलढाणा २०.८ (३), चंद्रपूर २१.६ (४), गोंदिया १५.६ (-१), नागपूर १७.३, वर्धा १९.५ (२), यवतमाळ २२.४ (५).