तुरळक ठिकाणी हलका पावसाची शक्यता

पुणे ः राज्यातील काही भागात हवेचा दाब कमी जास्त होत आहे. त्यामुळे कोकण, गोव्यात काही ठिकाणी जोरदार पाऊस झाला. तर कोकण, गोव्यात गोव्यात बहुतांशी ठिकाणी, मध्य महाराष्ट्रात काही ठिकाणी, मराठवाडा व विदर्भात तुरळक ठिकाणी हलका पाऊस पडल्याची नोंद शुक्रवारी (ता. २९) झाली.

कोकणातील बहुतांशी ठिकाणी शुक्रवारी (ता. २९) ढगाळ हवामान होते. काही ठिकाणी सकाळपासून ऊन पडले होते. त्यामुळे कोकणात सकाळपासून उकाडा वाढला होता. मध्य महाराष्ट्रातील पुणे शहराच्या परिसरात हलका पाऊस पडला. तर सातारा, सांगली, कोल्हापूर, सोलापूर, नगर, नाशिक खानदेशातील धुळे, जळगाव, नंदुरबार जिल्ह्यांत कडक ऊन पडले होते.

त्यामुळे हवामानात सकाळपासून उकाडा वाढून कमाल तापमानात वाढ झाली होती. जळगावमध्ये कमाल तापमानाची ३६.२ अंश सेल्सिअस तापमानाची नोंद झाली होती. मराठवाडा व विदर्भातही कडक ऊन पडल्याने चांगलाच उकाडा तयार झाला होता. परिणामी, कमाल तापमानात चांगलीच वाढ झाली होती.

येत्या मंगळवार (ता. ३) पर्यंत कोकण, गोव्यात काही ठिकाणी तर मध्य महाराष्ट्र, मराठवाडा व विदर्भात तुरळक ठिकाणी हलका पाऊस पडण्याची शक्यता आहे. आज (ता. ३०) कोकणात तुरळक ठिकाणी जोरदार पाऊस पडण्याची शक्यता आहे. कोकण, गोवा, मध्य महाराष्ट्र व मराठवाड्यात तुरळक ठिकाणी विजांचा कडकडाट व मेघगर्जनेसह पाऊस पडण्याचा अंदाज हवामान विभागाच्या सूत्रांनी वर्तविला.

शुक्रवारी (ता. २९) सकाळी आठ वाजेपर्यंत झालेला पाऊसः मिलिमीटरमध्ये कोकण ः कणकवली १४०, पेडणे, सांगे १००, देवगड ८०, केपे, राजापूर ७०, कानकोण, मालवण, उल्हासनगर ४०, महाड, पोलादपूर, संगमेश्वर देवरूख, सांवतवाडी, वैभववाडी ३०, अंबरनाथ, चिपळूण, गुहागर, खेड, कुडाळ २०. मध्य महाराष्ट्र ः पन्हाळा, शिरोळ ६०, आजरा, मिरज, पळस, सागंली ५०, चंदगड, हातकणंगले, कडेगाव, कराड ४०, कागल, कोल्हापूर, शाहूवाडी, वाई ३०, अक्कलकोट, खंडाळा, बावडा, पौड, मुळशी, राधानगरी, वाळवा, इस्लामपूर २०. विदर्भ ः गोंदिया, मूल, मूलचेरा ३०, आरमोरी, ब्रह्मपुरी, कोरची २०, अहिरी, अर्जुनीमोरगाव, चार्मोर्शी, धानोरा, गडचिरोली, सडकअर्जुनी, सिंरोचा १०.