बदलत्या वातावरणामुळे द्राक्ष बागा संकटाच्या फेऱ्यात

सांगली : जिल्ह्यातील द्राक्ष पट्ट्यात गेल्या तीन ते चार दिवसांपासून धुके वाढू लागले आहे. याचा फटका द्राक्ष बागेला बसत आहे. उशिरा फळ छाटणी केलेल्या द्राक्ष बागेवर फळकूजसह अन्य रोगाचा प्रादुर्भाव होण्यास प्रारंभ झाला आहे. त्यातच घडामध्ये पाणीसाठल्याने उन्हामुळे द्राक्षावर डाग पडू लागले आहेत. बदलत्या वातावरणामुळे सुमारे ५ ते १० टक्के बागांचे नुकसान होण्याची शक्‍यता द्राक्ष उत्पादक शेतकऱ्यांनी व्यक्त केली आहे.

जिल्ह्यात बदलत्या वातावरणमुळे अनेक शेतकऱ्यांनी द्राक्षाची उशिरा फळ छाटणी घेतली आहे. आज मितीस ही छाटणी घेऊन सुमारे ७० ते ८० दिवस झाले असून द्राक्ष बागेत फुलोरा अवस्था आली आहे. मात्र, गेल्या तीन ते चार दिवसांपासून वातावरणात बदल होऊ लागले आहे. थंडीसह धुकेही पडू लागले आहे. धुक्‍यामुळे घडामध्ये पाणी साठून राहत असून फळ कूज होण्यास प्रारंभ झाला आहे. तर सकाळी धुके आणि दुपारी ऊन यामुळे उन्हाच्या तडाख्याने द्राक्षावर डाग पडू लागले. परिणामी द्राक्ष उत्पादक शेतकऱ्यांना आर्थिक झळ सोसावी लागणार आहे.

याबाबत सांगली द्राक्ष संघाच्या विभागीय संचालक मारुती चव्हाण म्हणाले, की धुके अधिक वाढले आहे. यामुळे शेतकऱ्यांनी पाण्याचा वापर योग्य केला पाहिजे. शेतात पाणी साठू देऊ नये. द्राक्षाची हाताळणी करू नका, ज्या शेतकऱ्यांनी उशिरा छाटणी घेतली आहे. त्यांनी नत्राचे प्रमाण योग्य ठेवल्यास फळ कूज होण्याचे प्रमाण कमी होण्यास मदत होईल. उन्हापासून द्राक्षाचा बचाव करण्यासाठी आच्छादन करा.

धुक्यामुळे कीड रोगाचा प्रादुर्भाव होण्याची शक्‍यता आहे. शेतकऱ्यांनी तज्ज्ञांचा सल्ले घेऊन बुरशीनाशक फवारणीकरावी. यामुळे रोगाचा प्रादुर्भाव कमी होईल. - राजू पाटील , द्राक्ष उत्पादक, सावळज, जि. सांगली.