देशातून मॉन्सून परतला; थंडीची चाहूल

पुणे ः नैऋत्य मोसमी वारे बुधवारी (ता. २५) संपूर्ण देशातून माघारी परतल्याचे हवामान विभागाने जाहीर केले. तर, राज्यातील किमान तापमानात सरासरीच्या तुलनेत ५.४ अंशांपर्यंत घट झाली आहे. बुधवारी (ता. २५) सकाळी आठ वाजेपर्यंत नगरमध्ये १२.३ अंश सेल्सिअसची सर्वांत कमी किमान तापमानाची नोंद झाली असल्याचे हवामान विभागाच्या सूत्रांनी सांगितले. 

आज (गुरुवारी) कोकण, गोव्यात तुरळक ठिकाणी मेघगर्जनेसह पाऊस पडण्याची शक्यता आहे. मध्य महाराष्ट्र, मराठवाडा आणि विदर्भात हवामान कोरडे राहील. उद्या (शुक्रवारी) कोकण, गोवा, मध्य महाराष्ट्र आणि विदर्भात तुरळक ठिकाणी मेघगर्जनेसह पाऊस पडण्याची शक्यता आहे. मराठवाड्यात हवामान कोरडे राहण्याचा अंदाज आहे. पुणे परिसरातही आकाश अंशतः ढगाळ राहण्याची शक्यता हवामान विभागाने वर्तविली आहे. 

सध्या उत्तरेकडून वाहू लागलेले थंड वारे आणि दक्षिणेकडील वाढत असलेल्या कमाल तापमानामुळे राज्यातील कमाल आणि किमान तापमानात चढ-उतार होत आहे. विदर्भाच्या काही भागांत कमाल तापमानात सरासरीच्या एक ते दोन अंश सेल्सिअसने वाढ झाली आहे. विदर्भातील अकोला येथे ३५.८ अंश सेल्सिअस कमाल तापमानाची नोंद झाली. मराठवाड्याच्या काही भागांत, तर विदर्भाच्या उर्वरित भागात किंचित वाढ झाली आहे. राज्याच्या उर्वरित भागात कमाल तापमान सरासरीच्या जवळपास होते. 

मध्य महाराष्ट्र आणि विदर्भाच्या काही भागांत किमान तापमानात सरासरीच्या तुलनेत लक्षणीय घट झाली आहे. राज्याच्या उर्वरित भागात किमान तापमान सरासरीच्या जवळपास होते. नगरपाठोपाठ परभणी येथे सरासरीच्या तुलनेत ५.१ अंशापर्यंत घट होऊन १४.४ किमान तापमानाची नोंद झाली होती. तसेच नागपूर, सोलापूर, अकोला येथील सरासरीच्या तुलनेत ३.५ अंशाने घट झाली आहे. 

बुधवारी (ता. २५) सकाळी आठ वाजेपर्यंतचे कमाल, कंसात किमान तापमान ः अंश सेल्सिअसमध्ये : मुंबई ३५.५ (२४.२), सांताक्रूझ ३५.६ (२१.४), अलिबाग ३५.६ (२१.६), रत्नागिरी ३५.० (२३.५), डहाणू ३३.५ (२१.५), पुणे ३२.४ (१५.१), नगर - (१२.३), जळगाव ३४.०, कोल्हापूर ३२.२ (१९.९), मालेगाव ३३.४ (१६.०), नाशिक ३२.५ (१३.८), सांगली ३३.४ (१८.०), सातारा ३२.१ (१५.५), सोलापूर - (१६.७), उस्माबाद - (१४.१), औरंगाबाद ३३.६ (१६.०), परभणी ३४.० (१४.४), नांदेड - (१८.०), अकोला ३५.८ (१६.५), अमरावती ३१.८ (१६.४), बुलडाणा ३२.० (१७.६), ब्रह्मपुरी ३४.८ (१७.९),  चंद्रपूर ३५.० (१९.४), गोंदिया ३३.८ (१७.५), नागपूर ३४.३ (१५.०), वाशीम ३३.० (१७.२), वर्धा ३५.० (१५.९), यवतमाळ ३४.५ (१५.०)