मुंबई ः पुढील काही दिवसांत केंद्र सरकारकडून गव्हावरील आयात शुल्क वाढविले जाण्याची शक्‍यता आहे. त्यापूर्वीच भारतातील व्यापारी अधिक गहू आयात करत आहेत. देशात सप्टेंबरअखेर आणि ऑक्‍टोबरच्या मध्यावधीमध्ये युक्रेनमधून १ लाख टन आयात गहू भारतातील बंदरात दाखल होणार आहे, अशी माहिती सूत्रांनी दिली आहे.
भारतात आयात होणारा गव्हाचा दर प्रतिटन २०७-२१० डॉलर असा आहे. ऑक्‍टोबरपासून रब्बी गहू पिकासाठी पेरणी सुरू होणार आहे. रब्बीतील गहू पेरणीसाठी शेतकऱ्यांना प्रोत्साहन देण्यात येणार आहे. त्यासाठी गव्हावरील आयात शुल्क केंद्राकडून दुपटीने वाढविले जाण्याची शक्‍यता आहे.
सध्या गहू आयातीवर १० टक्के शुल्क आहे. यामुळे देशात खासगी व्यापाऱ्यांकडून मोठ्या प्रमाणात गहू आयात केला जात आहे. याआधी देशातील व्यापाऱ्यांनी युक्रेन आणि रशियातून ६ लाख टन गहू आयातीसाठी करार केले आहेत. काळा समुद्र भूभागात गव्हाचे बंपर उत्पादन झाल्याने दर घसरले आहेत. यामुळे कमी किमतीत गहू मोठ्या प्रमाणात आयात केला जात आहे.
आयात गव्हामुळे दरात घसरण
देशातील व्यापारी मोठ्या प्रमाणात परदेशांतून गहू आयात करत असल्यामुळे देशांतर्गत बाजारातील गव्हाच्या दरात घसरण होऊ लागली आहे. दिल्लीत सोमवारी (ता. १८) गव्हाचा दर प्रतिक्विंटल १,७५० रुपयांपर्यंत खाली आला होता. मागणी कमी राहिल्याने गव्हाच्या दरात घसरण होत असल्याची माहिती सूत्रांनी दिली आहे.
युक्रेन आणि ऑस्ट्रेलियातून गहू आयात केला जात आहे. याचा परिणाम देशांतर्गत बाजारातील गव्हाच्या दरावर होत असल्याचे दिसून येत आहे
