पुणे विभागात गव्हाची एक लाख ६६ हजार हेक्‍टरवर पेरणी

पुणे  ः पुणे विभागात गव्हाची पेरणी उरकली असून, सध्या पीक वाढीच्या अवस्थेत आहे. आत्तापर्यंत विभागात सरासरी एक लाख ७२ हजार ३९४ हेक्‍टरपैकी एक लाख ६६ हजार ८५६ हेक्‍टरवर म्हणजेच ९७ टक्के क्षेत्रावर गव्हाची पेरणी झाली असल्याचे कृषी विभागाच्या सूत्रांनी सांगितले.

यंदा चांगल्या झालेल्या पावसामुळे गव्हाच्या पेरणीच्या क्षेत्रात वाढ होण्याचा अंदाज कृषी विभागाच्या सूत्रांचा होता. गव्हाच्या पेरणीस नोव्हेंबर ते डिसेंबर हा कालावधी योग्य असल्याने मोठ्या प्रमाणात शेतकऱ्यांनी गव्हाची पेरणी केली आहे. सध्या पिके वाढीच्या अवस्थेत आहेत. लवकर पेरणी झालेल्या ठिकाणी गहू ओंबी निसवण्याच्या अवस्थेत आहे. पुणे जिल्ह्याचा पूर्वेकडील भाग, नगर जिल्ह्याच्या उत्तरेकडील तालुके, सोलापूरातील अक्कलकोट, मंगळवेढा, दक्षिण सोलापूर हे तालुके गहू पिकासाठी ओळखले जातात.

विभागात नगर जिल्ह्यात गव्हाचे सरासरी ६९ हजार ४६१ हेक्‍टर क्षेत्र आहे. त्यापैकी ६९ हजार ७७ हेक्‍टर म्हणजेच ९९ टक्के पेरणी झाली आहे. पुणे जिल्ह्यात सरासरी ६० हजार ४९ हेक्‍टर क्षेत्र आहे. त्यापैकी ४२ हजार ३८० हेक्‍टर म्हणजेच ७१ टक्के पेरणी झाली आहे. सोलापूर जिल्ह्यात सरासरी क्षेत्र ४२ हजार ८८४ हेक्‍टर आहे. त्यापैकी ५५ हजार ३९९ हेक्‍टर म्हणजेच १२९ टक्के पेरणी झाली आहे.

यंदा झालेल्या अधिक पेरणीमुळे गव्हाच्या उत्पादनात मोठी वाढ होण्याची शक्‍यता असल्याचे कृषी विभागाच्या सूत्रांनी सांगितले.