साताऱ्यात उसावर ‘हुमणी’चा प्रादुर्भाव

सातारा  ः जिल्ह्यातील विविध पिकांवर ‘हुमणी’चा प्रादुर्भाव झाल्याने शेतकऱ्यांना नुकसानीला सामोरे जावे लागत आहे. या किडीचा ऊस पिकावर सर्वाधिक प्रादुर्भाव दिसून येत असून, हजारो हेक्‍टरवर क्षेत्र ‘हुमणी’च्या विळख्यात आले आहे. हवामानातील बदलामुळे ‘हुमणी''चा प्रादुर्भाव वाढत असल्याचे शेतकऱ्यांनी सांगितले.

जिल्ह्यातील खरिपातील भुईमूग, सोयाबीनसह ऊस पिकावर ‘हुमणी''चा प्रादुर्भाव झाला आहे. सध्या उसावर मोठ्या प्रमाणात ‘हुमणी’चा प्रादुर्भाव असल्याने हे पीक वाळून जात आहे. नदीकाठच्या क्षेत्रावर ‘हुमणी’चा जास्त प्रादुर्भाव जाणवत आहे. अगदी आठ ते दहा फूट उंचीचा ऊस यामुळे वाळला आहे. आडसाली उसावरही हा प्रादुर्भाव झाल्याने वाढीवरही परिणाम झाला आहे. आॅक्टोबरच्या सुरवातीस झालेल्या पावसामुळे काही प्रमाणात हुमणीचा प्रादुर्भाव कमी झाला होती. त्यानंतर पुन्हा प्रादुर्भाव वाढला आहे. सोयाबीन पिकावरही ‘हुमणी’चा प्रादुर्भाव झाल्यामुळे उत्पादनात मोठी घट होत असल्याचे शेतकऱ्यांनी सांगितले.

‘हुमणी’चा प्रादुर्भाव झाल्याने ऊस वाळून जात आहे. काही शेतकऱ्यांकडून वैरणीसाठी उसाची विक्री केली जात आहे. मात्र वैरण पाठवण्यास मर्यादा आहेत. जिल्ह्यातील अनेक कारखान्यांचे बॅायलर अग्निप्रदीपन झाले असले, तरी प्रत्यक्ष गाळप सुरू झालेले नाही. यामुळे साखर कारखान्यांनी लवकरात लवकर गाळप सुरू करून हुमणी बाधित उसाला प्राधान्य देऊन ऊस तोड करावी. यामुळे काही प्रमाणात का होईन नुकसान कमी होण्यास मदत होईल.

२४५५ हेक्टर ऊस क्षेत्र बाधित ऊस पिकावर ‘हुमणी’चा सर्वाधिक प्रादुर्भाव झाला असून, कृषी विभागाने केलेल्या पाहणीनुसार जिल्ह्यातील २४५५ हेक्टर क्षेत्रावर प्रादुर्भाव झाला असल्याचे दिसून आले आहे. उसासह इतर पिकांवर ‘हुमणी’चा प्रादुर्भाव झाला असल्याने नुकसान क्षेत्रात वाढ होणार आहे.