जलयुक्त गावांना अनुदान देण्याचा विचार : डवले

नाशिक : जलयुक्त शिवार योजनेमुळे पाणीटंचाईवर मात करणे शक्‍य झाले आहे. यापुढे जलयुक्‍त शिवार योजनेची यंत्रणा जलयुक्त झालेल्या गावांत कायमस्वरूपी चालविण्यासाठी दरवर्षी त्या गावांना अनुदानाच्या रूपात ठराविक निधी देण्याचा शासनाचा विचार आहे, असे प्रतिपादन जलसंधारण विभागाचे सचिव एकनाथ डवले यांनी केले.

येथील ठक्कर डोम येथे आयोजित ‘कृषिथॉन’ प्रदर्शनात जलयुक्त शिवार योजनेत यशस्वी झालेल्या गावांचा व संस्थांचा सत्कार नुकताच श्री. डवले यांच्या हस्ते झाला. त्या वेळी ते बोलत होते. ते म्हणाले, की जलयुक्तची फलश्रुती आता राज्यात दिसू लागली आहे. जलयुक्त झालेल्या गावांनी आता पुढे काय करायचे, हा मोठा प्रश्‍न होता. मात्र, गावातील जलवितरण आणि जलयुक्तची यंत्रणा सुरळीत ठेवण्यासाठी त्या गावांना शासनातर्फे ठराविक अनुदान देण्याचा विचार आहे. त्यामुळे देखभालीच्या खर्चाची चिंता राहणार नाही, असेही श्री. डवले म्हणाले.

या वेळी विभागीय आयुक्‍त महेश झगडे, प्रा. प्रदीप पुरंदरे, दारफळ उस्मानाबादचे लोकराज्य ग्रामचे मुख्य प्रवर्तक आदित्य गोरे, धुळ्याचे कृषी अधीक्षक प्रकाश सांगळे यांची भाषणे झाली. संयोजक संजय न्याहारकर यांनी स्वागत केले. या वेळी ३६ गावे व संस्थांचा सत्कार करण्यात आला.  

शेतीशी नाते कायम ठेवा : डॉ. राम खर्चे कृषी उत्पादनात भारताचा क्रमांक पहिला असला, तरी शेतीतील उत्पादकता अजूनही कमीच आहे. त्यामुळे शेतकऱ्यांच्या मुलांनी इतर क्षेत्रांत प्रगती करतानाच शेतीशी असलेले आपले नाते कायम ठेवावे, असे प्रतिपादन महाराष्ट्र कृषी संशोधन परिषदेचे उपाध्यक्ष डॉ. राम खर्चे यांनी येथे केले. ‘कृषिथॉन’ प्रदर्शनाच्या निमित्ताने गुणवंत कृषी विद्यार्थी पुरस्काराचे वितरण आज डॉ. खर्चे यांच्या हस्ते झाले. त्या वेळी ते बोलत होते.