नगरमध्ये महिला, नागरिकांनी अडवला पालकमंत्र्यांचा ताफा

नगर : दुष्काळी परिस्थितीची पाहणी करत असलेल्या पालकमंत्री राम शिंदे यांचा ताफा काल आंतरवली बु. (ता. शेवगाव) येथे महिला, नागरिकांनी ताफा अडवला. पिण्याच्या पाण्यासाठी कायमस्वरूपी सोय, बोंड अळीचे रखडलेले अनुदान, चाऱ्याचा प्रश्न आदी विषयांवर ग्रामस्थ आक्रमक होते.

जिल्हाभरात सध्या तीव्र दुष्काळ पडला आहे. शेवगाव, पाथर्डी, नगर, पारनेर, कर्जत, जामखेड भागांत दुष्काळाची तीव्रता जास्त आहे. त्यामुळे गेल्या चार दिवसांपासून पालकमंत्री राम शिंदे दुष्काळी भागातील परिस्थितीची पाहणी करत आहेत. काल (गुरुवारी) नगर, पाथर्डी तालुक्यांतील काही भागांत पाहणी करून पालकमंत्री शिंदे शेवगाव तालुक्यात गेले. शेवगाव तालुका कृषी अधिकाऱ्यांनी कुठे पाहणी करायची हे ठिकाण निश्चित केले होते.

ठरल्याप्रमाणे आंतरवली बुद्रुक येथे पालकमंत्री शिंदे दुष्काळ पाहणी करण्यासाठी येणार असल्याची माहिती कळताच ग्रामस्थ जमा झाले. शिंदे येताच पाहणी करण्याच्या ठिकाणापासून काही अंतरावरच महिलांनी आडवे येऊन ताफा अडवला. बंद असलेली प्रादेशिक  पाणीपुरवठा नळयोजना सुरू करा, चारा, बोंड अळीचे थकीत अनुदान आदी विषयांवर ग्रामस्थ आक्रमक होते. त्यात महिलांही आक्रमक होत्या.

जवळपास पंधरा मिनिटांपेक्षा अधिक काळ ताफा अडवला होता. शेवटी शिंदे यांनी अश्वासन दिल्याने वाट मोकळी झाली. मात्र नसती आफत म्हणून कृषी अधिकारी मात्र चांगलेच तणावाखाली होते. दुष्काळाच्या पार्श्वभूमीवर भविष्यात अशा रोषाला नेत्या, मंत्र्यांना सामोरे तर जावे लागणार नाही ना? या प्रश्नाने प्रशासनही सावध झाले आहे. तालुका पातळीवर होत असलेल्या आढावा बैठकातही लोक अधिकारी, पदाधिकाऱ्यावर रोष व्यक्त करू लागले आहेत.