धुळे, जळगाव जिल्ह्यांतील पैसेवारी चुकीची

जळगाव   ः धुळे व जळगाव जिल्ह्यांत हवा तसा पाऊस यंदा झाला नाही. जूनमध्ये धुळ्यात नुकसानकारक पाऊस झाला. नंतर जुलै व ऑगस्टमध्ये मिळून २५ ते २७ दिवस पावसाचा खंड सर्वत्र राहिला. आता प्रशासन जाहीर करीत असलेली पैसेवारी ५० पैशांपेक्षा अधिक आहे. पाऊस नाही, पिकांची स्थिती नाजूक आहे, पण पैसेवारी अधिक असल्याने शेतकऱ्यांना दुष्काळी स्थितीचा लाभ मिळणार नाही, असे शेतकऱ्यांचे म्हणणे आहे.

दोन्ही जिल्ह्यांमध्ये यंदा ९२ टक्‍क्‍यांपर्यंत पेरणी झाली. शासनाने पेरणी ७५ टक्‍क्‍यांपेक्षा कमी असल्यास दुष्काळी स्थिती असेल, असे म्हटले. नंतर ऑगस्टअखेरपर्यंत पाऊस दोन्ही जिल्ह्यांमध्ये ६१ टक्‍क्‍यांवर झाला. सप्टेंबरमध्ये पाऊस नाही. याच आधारावर प्रशासनाने पैसेवारी दाखविली आहे. जळगाव जिल्ह्याची पैसेवारी ६४ पर्यंत आहे. धुळ्यातही ती ५० पेक्षा अधिक आहे. या सर्व स्थितीत शेतकरी दुष्काळी मदतीला मुकतील. गावांमध्ये टंचाईस्थिती आहे. मूग, उडीद, सोयाबीन, कोरडवाहू कापूस पिके हातची गेल्यात जमा आहेत. ज्वारी व कोरडवाहू कापसाला पावसाची गरज आहे. कूपनलिकांची पाणी पातळी घटली आहे. प्रशासनाने ऑगस्टअखेरचे आकडे घेतले. परंतु सप्टेंबरनंतर पैसेवारी जाहीर करावी. कारण तेव्हा नेमका पाऊस किती झाला, हे स्पष्ट होते, असे शेतकऱ्यांचे म्हणणे आहे.

मध्यंतरी ऑगस्टमध्ये पाऊस आला, पण तोपर्यंत मूग, उडीद ही पिके हातची गेली होती. नंतर पाऊस आला त्याचा किरकोळ लाभ कापूस पिकाला झाला. सोयाबीन, कोरडवाहू कापसाला पाते लागत असताना पावसाने दडी मारली आहे. प्रशासनाने महसूल मंडळांमधील नेमकी पावसाची स्थिती, पिके कशी आहेत, हे न पाहताच निर्णय घेतल्याचा शेतकऱ्यांचा आरोप आहे.