वृक्ष लागवडीसाठी यंदा १७ लाख ७३ हजार रोपे तयार

सोलापूर  :  राज्य शासनाच्या १३ कोटी वृक्ष लागवड अभियानासाठी वन  विभाग आणि सामाजिक वनीकरण विभागाने आतापर्यंत यंदा १७ लाख ७३  हजार रोपे तयार केली आहेत. जिल्ह्यास यंदा १६ लाख वृक्ष लागवड करण्याचे उद्दिष्ट्य आहे. मात्र त्यापेक्षा अधिक २२ लाख २६ हजार वृक्ष लागवडीचे उद्दिष्ट्य जिल्हा स्तरावर निश्‍चित करण्यात आले आहे. यासाठी यंदाची १७ लाख ७३ हजार आणि गेल्या वर्षीची शिल्लक १३ लाख ९४ हजार ९३३ अशी एकूण ३१ लाख ६७ हजार ९३३ रोपे तयार होणार असल्याची माहिती वनविभागाकडून देण्यात आली.

वन विभागाकडून याबाबत सविस्तर नियोजन करण्यात आले आहे. यानुसार वन विभागाच्या जिल्ह्यात ११ तर सामाजिक वनीकरण विभागाच्या १७ अशा एकूण २८ रोपवाटिका आहेत. वन विभागाकडे गेल्या वर्षीची ७ लाख २२ हजार तर सामाजिक वनीकरण विभागाकडे ६ लाख ७२ हजार रोपे तयार आहेत. यंदा वन विभाग १० लाख ७७ हजार तर सामाजिक वनीकरण विभाग ६ लाख ९६ हजार रापे तयार करणार आहे.

जिवंत रोपे समजण्यासाठी वनयुक्त शिवार ॲप

हा उपक्रम यशस्वी होण्यासाठी जिल्हाधिकारी कार्यालयात समर्पित कक्ष तयार करण्यात आला आहे. सेवानिवृत्त सहाय्यक वनसंरक्षक विकास पाटील त्याचे प्रमुख आहेत. जिवंत रोपांची टक्केवारी कळण्यासाठी वनयुक्त शिवार ॲप विकसित करण्यात आले आहे.  यामध्ये रोपांबाबत माहिती भरण्याचे प्रशिक्षण देण्यात आले आहे.  या कार्यक्रमासाठी महाराष्ट्र हरित सेना (ग्रीन आर्मी) हे संकेतस्थळ विकसित केले असून विभागांनी आपली माहिती यामध्ये भरावी, असे आवाहन उपवनसंरक्षक संजय माळी यांनी केले आहे.