दीड वर्षापासून रखडली फळ पीकविम्याची रक्कम

धुळे : हवामानावर आधारित फळ पीकविमा योजनेतून २०१५-१६ मध्ये केळीसंबंधी विमा हप्ता भरलेल्या २२२ शेतकऱ्यांना अजूनही विमा भरपाईची रक्कम मिळालेली नाही. या संदर्भात शेतकऱ्यांनी जिल्हा प्रशासनाकडे नुकतीच तक्रार केली आहे.  शिरपूर तालुक्‍यातील होळनांथे महसूल मंडळांतर्गत असलेल्या गावांमधील शेतकऱ्यांनी केळीसंबंधी विमा हप्ता एका राष्ट्रीयीकृत बॅंकेकडे भरला होता. नंतर कमी तापमानाबाबत शेतकऱ्यांना भरपाईची रक्कम जाहीर झाली. एकूण २९ लाख रुपये रक्कम मंजूर झाली. हेक्‍टरी ९१०० रुपये, अशी रक्कम शेतकऱ्यांना देय असल्याचे विमा कंपनीने म्हटले होते, परंतु दीड वर्ष झाले तरी ही रक्कम शेतकऱ्यांना प्राप्त झालेली नाही. शेतकरी बॅंकेकडे गेल्यास त्यांना धुळे येथील बॅंक मुख्यालयात चौकशीसाठी पाठविले जाते. मुख्य शाखेकडून विमा कंपनीला विचारा, अशी उत्तरे दिली जातात.  धुळे ते होळनांथे हे अंतर सुमारे ६० किलोमीटर आहे. एवढे अंतर दुचाकी किंवा एसटी बसने पार करून शेतकरी चकरा मारत आहेत, परंतु त्यांची दखल घेतली जात नाही. यामुळे शेतकऱ्यांनी जिल्हा प्रशासन व बॅंकेच्या मुख्यालयास एक निवेदन दिले. केळी उत्पादकांना अपेक्षित दर मागील वर्षी मिळाले नाहीत. त्यातच विमा हप्त्यासंबंधीची भरपाईदेखील न मिळाल्याने शेतकरी नाराज झाले आहेत. विमा हप्ता हेक्‍टरी सहा हजार रुपये एवढा भरला होता. भरपाई फक्त ९१०० रुपये मिळाली. हा प्रकारही शेतकऱ्यांच्या तोंडाला पाने पुसण्याचा आहे. कमी तापमानात केळीचे ५० टक्के नुकसान झाले होते. तसेच केळीचा दर्जा घसरून तिची कमी दरात विक्री करावी लागली होती. आता भरपाईसाठी शेतकऱ्यांना बॅंका व प्रशासनाकडे चकरा माराव्या लागत असल्याने असंतोषाची भावना निर्माण झाली आहे, असे शेतकऱ्यांनी म्हटले आहे. निवेदन देताना अॅड. प्रकाश पाटील व इतर शेतकरी उपस्थित होते.