सातारा 'झेडपी'कडून शेतकऱ्यांसाठी 'सेवा पुरवठादार'

सातारा : कृषी क्षेत्रातील समस्या दिवसेंदिवस वाढत आहेत. यांत्रिकीकरण, शेतमजूरी, कीड - रोगांचा प्रादुर्भाव, कीटकनाशके या सर्व बाबींवर शेतकऱ्यांना सेवा पुरविण्यासाठी आता जिल्हा परिषदेच्या कृषी विभागाने पुढाकार घेतला आहे. शेतकऱ्यांना कृषी विषयक कामे माफक दराने करून देण्यासाठी जिल्हा परिषदेच्या गटनिहाय सेवा पुरवठादार नेमून त्यांना अर्थसाह्य देण्याची योजना जिल्हा परिषदेकडून राबविण्यात येणार आहे.

शेतीमधील भांडवल व मिळणारे उत्पादन यांची गणित जुळत नसल्याने शेती किफायतशीर होत नाही, असे दिसून येत आहेत. अशावेळी शेतकऱ्यांना भांडवलाअभावी कृषी अवजारे, ट्रॅक्‍टर, प्रक्रिया यंत्रांसाठी इतरांवर अवलंबून राहावे लागते. त्यामुळे मजुरीचा दरही वेळप्रसंगी जादा द्यावा लागतो. शेतीमधील मजुरांच्या व सेवा सुविधांच्या समस्यांची सोडवणूक करण्यासाठी, कमी भाडेदरात साधने मिळण्यासाठी कृषी सभापती मनोज पवार यांच्या संकल्पनेतून सेवा पुरवठादार नेमण्याची योजना जिल्हा परिषद राबवित आहे.

जिल्हा परिषदेच्या प्रत्येक गटात सेवा पुरवठादार नेमले जाणार असून, त्यात दहा प्रगतिशील शेतकऱ्यांचा गट तयार केला जाणार आहे. त्यांच्यासाठी सेस फंडातून १ कोटी ९४ लाखांची तरतूद केली आहे.

योजनेत सेवा पुरवठादारांवर जबाबदाऱ्या निश्‍चित केल्या असून, त्याने वर्षभरात किमान १०० हेक्‍टर क्षेत्रावर कृषी विषयक सेवा देणे तसेच प्रचलित भाडेदरापेक्षा किमान २५ टक्‍के कमी दराने भाडेपट्टी आकारून सेवा देणे बंधनकारक आहे. फवारणीची कामे प्रशिक्षित व पेस्ट कंट्रोल परवानाधारक व्यक्‍तीच्या मार्गदर्शनाखाली करावी लागणार आहे. या गटास लागणाऱ्या कृषी अवजारांसाठी तीन लाखांपर्यंत जिल्हा परिषदेच्या सेस फंडातून अनुदान दिले जाणार आहे.

शेतकऱ्यांना पुरविलेल्या सेवा-सुविधांची माहिती रेकॉर्ड केली जाणार असून, त्याची तपासणीही केली जाणार आहे. शेतकऱ्यांना योग्य प्रकारे सेवा पुरविली जात आहे की नाही, याची पंचायत समिती व विस्तार अधिकाऱ्यांमार्फत तपासणी केली जाणार असल्याने शेतकऱ्यांना त्याचा लाभ होईल.

या योजनेचा उद्देश...