पुणे जिल्ह्यातील ११ कारखान्यांचा हंगाम सुरू

पुणे : साखर कारखाने सुरू करण्यासाठी शासनाने दिलेल्या आदेशानुसार पुणे जिल्ह्यातील अकरा साखर कारखान्यांनी एक नोव्हेंबरपासून गाळप हंगाम सुरू केला आहे. उर्वरित सहा कारखान्यांचाही गळीत हंगाम एक दोन दिवसांत सुरू होणार असल्याचे साखर आयुक्तलयाच्या सूत्रांनी सांगितले. 

राज्य शासनाने गळीत हंगाम सुरू करण्यासाठी साखर कारखान्यांना ऑनलाइन नोंदणी करण्याचे आदेश दिले होते. त्यानुसार ३१ ऑक्टोबरपर्यंत पुणे जिल्ह्यातील १७ कारखान्यांनी परवान्यांसाठी ऑनलाइन अर्ज केले आहेत. त्यातील ११ साखर कारखान्यांना ऑनलाइन परवाने दिले आहेत. त्यामुळे या कारखान्यांचा गळीत हंगाम सुरू झाला आहे; परंतु सहा कारखान्यांच्या अर्जांमध्ये काही किरकोळ त्रुटी असून, पूर्तता केल्यानंतर एक दोन दिवसांत परवाने दिले जाणार आहेत.

त्यानंतर त्यांना गळीत हंगाम सुरू करता येणार आहे. यंदा शिरूर तालुक्यात पराग अॅग्रो या नव्याने कारखाना सुरू होणार आहे, तर दोन कारखाने बंद राहणार असल्याचे चित्र आहे. येत्या पाच ते सहा दिवसांत जिल्ह्यातील १७ कारखाने सुरू होणार असून, हे कारखाने पूर्ण क्षमतेने हंगामात चालतील.

सध्या जिल्ह्यातील सहकारी आणि खासगी असे एकूण जवळपास १८ साखर कारखाने आहेत. या साखर कारखान्यांनी चालू गळीत हंगामात ८१ लाख मेट्रिक टन साखर गाळप करण्याचे नियोजन केले आहे. पुणे जिल्ह्यातील पूर्व, उत्तर भागात उसाचे दरवर्षी उत्पादन घेतले जाते.

गेल्या वर्षी उशिराने झालेल्या पावसामुळे जवळपास सव्वा लाख हेक्टरवर उसाच्या लागवडी झाल्या असल्याची स्थिती आहे. त्यापैकी यंदा गाळपासाठी सुमारे एक लाख १३ हजार १४० हेक्टरवरील ऊस उपलब्ध होण्याची शक्यता आहे. चालू वर्षी उसाचे सुमारे ८१ लाख टन गाळप होण्याचे अपेक्षित आहे.

त्यातून ९० लाख मेट्रिक टन साखर तयार होईल. सध्या मोठ्या प्रमाणात ऊसतोडणी मजूर कारखाना स्थळावर दाखल झाले असून, उसाच्या तोडणीस काही ठिकाणी प्रारंभ झाला आहे.

यंदाच्या गाळप हंगामात ऊसतोडणासाठी मजुरांएैवजी ऊसतोडणी यंत्राचा वापर होणार आहे. त्यामुळे साखर कारखाना कार्यस्थळावर वर्दळ वाढली असल्याचे साखर कारखान्यांच्या सूत्रांनी सांगितले.