अंबाजोगाई येथे ‘जेल भरो’ आंदोलन

बीड : मराठा आरक्षणाच्या मागणीसह आरक्षणाचा ठोस निर्णय होईपर्यंत मेगा भरती थांबवावी यासाठी जिल्ह्यात आंदोलने सुरूच आहेत. बुधवारी अंबाजोगाई येथे जेल भरो आंदोलन करण्यात आले तर गेवराई येथे दुपारपर्यंत आठवडी बाजार बंद ठेवण्यात आला.

अंबाजोगाई येथे दीडशेवर कार्यकर्त्यांनी मराठा आरक्षणासाठी घोषणा देत बस स्थानकासमोर जेल भरो आंदोलन केले. या वेळी पोलिसांनी २५ आंदोलनकर्त्यांना ताब्यात घेऊन नंतर सोडून दिले.  परळी येथे १८ जुलै पासून सुरू असलेले ठिय्या आंदोलन बुधवारी (ता. १) १५ व्या दिवशीही सुरूच होते. ठोस अाश्वासनाशिवाय माघार नाहीच, असा पवित्रा आंदोलकांनी घेतला आहे. बुधवारी शेतकरी नेते डॉ. अजित नवले यांनी आंदोलनस्थळी भेट दिली. विभागीय आयुक्त डॉ. पुरुषोत्तम भापकर बुधवारी परळी दाखल झाले. या वेळी त्यांनी अधिकाऱ्यांची बैठक घेऊन आंदोलनाबाबत माहिती घेतली.