साताऱ्यात आंदोलनास उत्स्फूर्त प्रतिसाद

सातारा  : मराठा आरक्षणाच्या मागणीसाठी बुधवारी (ता. २५) येथे पुकारलेल्या बंदला उत्स्फूर्त प्रतिसाद मिळाला. मोर्चानंतर मराठा क्रांती मोर्चाच्या आंदोलनास गालबोट लागले. महामार्ग रोको आंदोलन करताना युवक आक्रमक झाल्याने पोलिसांनी जमावाला पांगविण्यासाठी लाठीचार्ज केला. मात्र, युवकांनी महामार्गाच्या खाली जाऊन दोन्हीकडून दगडफेक केल्याने पोलिसांनी अश्रुधुराच्या नळकांड्या फोडल्या. काही युवकांनी केलेल्या दगडफेकीत पोलिस अधीक्षक संदीप पाटील यांच्यासह चार अधिकारी जखमी झाले.

जिल्ह्यात सकाळपासूनच बंदचे वातावरण होते. `एक मराठा लाख मराठा' अशा घोषणा देत हजारोंच्या संख्येने जमलेल्या समुदायाने अकरा वाजता गांधी मैदानावरून जिल्हाधिकारी कार्यालयाच्या दिशेने वाटचाल सुरू केली. मोर्चात आमदार शिवेंद्रसिंहराजे भोसले, शशिकांत शिंदे, जयकुमार गोरे, नगराध्यक्षा माधवी कदम आदी सहभागी झाले होते.

जिल्हाधिकारी कार्यालयासमोर महामोर्चाची सांगता झाली. त्यानंतर महामार्ग रोको आंदोलन करताना युवक आक्रमक झाल्याने पोलिसांनी जमावाला पांगविण्यासाठी लाठीचार्ज केला. मात्र, युवकांनी महामार्गाच्या खाली जाऊन दोन्हीकडून दगडफेक केल्याने पोलिसांनी अश्रुधुराच्या सहा ते सात नळकांड्या फोडल्या. शेवटी युवकांची धरपकड सुरू केल्यानंतर आंदोलक युवक बाजूला झाले. युवकांनी महामार्ग रोखला व टायर जाळले. त्यामुळे पुणे व कोल्हापूर बाजूकडील वाहतूक थांबविण्यात आली. पोलिसांनी महामार्गावर आंदोलन करणाऱ्या युवकांना खाली जाण्याचे आवाहन केले. पण कोणीही ऐकत नव्हते. जमाव आक्रमक होत असल्याने पोलिसांनी सौम्य लाठीचार्ज केला.

पण त्यानंतर आंदोलक अधिकच आक्रमक झाले. काही युवकांनी दगडफेक करण्यास सुरवात केली. यामध्ये पोलिस अधीक्षकांसह चार अधिकारी जखमी झाले. या वेळी जमावाने पोलिसांच्या सहा, खासगी दोन, तहसीलदारांच्या गाडीवर दगडफेक केली. त्यानंतर पोलिसांनी युवकांची धरपकड सुरू केली. त्यामुळे जमाव पांगला. परिस्थिती नियंत्रणाखाली आल्यावर राष्ट्रीय महामार्गावरील वाहतूक सुरळीत सुरू झाली. जिल्ह्यातील ग्रामीण भागात कडकडीत बंद पाळण्यात आला. अनेक ठिकाणी रॅली काढून ठिय्या, रास्ता रोको आंदोलन करण्यात आले.