नगर जिल्ह्यात आंदोलनाची तीव्रता कायम

नगर  ः मराठा समाजाला आरक्षण मिळावे, या मागणीसाठी गुरुवारी (ता.२६) नगर जिल्ह्यातील अनेक भागात बंद पाळून रास्ता रोको आंदोलन करण्यात आले. आंदोलनामुळे गुरुवारी देखील वाहतुकीवर परिणाम झालेला दिसला. जिल्ह्यातील दक्षिण भागात गुरुवारी आंदोलनाची तीव्रता अधिक होती. कर्जतमध्ये कार्यकर्त्यांनी पंचायत समिती कार्यालयाला कुलूप लावले.

मराठा समाजाला आरक्षण मिळावे, या मागणीसाठी पाच ते सहा दिवसांपासून आंदोलन सुरू आहे. तीन दिवसांपासून त्याची तीव्रता नगरमध्येही दिसून येत आहे. गुरुवारी सलग तिसऱ्या दिवशी जिल्ह्यातील अनेक भागात आंदोलन झाले. श्रीगोंदा तालुक्‍यातील ढोकराई फाटा, पाथर्डी तालुक्‍यातील मिडसांगवी, कर्जतमधील मिरजगाव, पारनेरमधील निघोज, टाकळी ढोकेश्‍वर येथे रास्ता रोको आंदोलन करण्यात आले. पारनेर तालुक्‍यात कान्हूर पठार, टाकळी ढोकेश्‍वर, पारनेर, सुपा, पिंपळगाव रोठा, निघोज, अळकुटी, जवळा येथे तर कर्जत तालुक्‍यातील माही जळगाव येथे बंद पाळून आठवडी बाजार बंद ठेवण्यात आला. कुळधरण भागात गुरुवारीही एसटी सेवा सुरू झाली नाही.

मिरजगाव, चिचोंडी पाटील येथे बंद पाळण्यात आला. गुरुवारी झालेल्या आंदोलनाचा वाहतुकीवर परिणाम झाला. आंदोलनाचा अंदाज घेत आगारातून एसटी गाड्या सोडण्यात येत होत्या. गुरुवारी बंद असलेल्या भागात लोकांनी संताप व्यक्त करत लोकप्रतिनिधींनी राजीनामे देण्याची मागणी केली. गुरुवारी दक्षिण भागातील पारनेर, श्रीगोंदा, पारनेर, भागात आंदोलनाची तीव्रता अधिक होती. कर्जतमध्ये कार्यकर्त्यांनी पंचायत समितीला कुलूप लावले.

दरम्यान, बुधवारी नगर शहरासह जिल्हाभरात झालेल्या रास्ता रोको आंदोलनात सहभागी झालेल्या कार्यकर्त्यांवर गुन्हे दाखल केले जात आहेत. त्यामुळे सरकारवरील रोष अधिकच तीव्र होत असून गुन्हे दाखल करण्याचे षङ्‌यंत्र रचले तर आंदोलन अधिक तीव्र करण्याचा इशारा कार्यकर्ते देत आहेत.