सोलापूर : कुर्डुवाडी कृषी उत्पन्न बाजार समितीच्या वतीने सुरू करण्यात आलेल्या उडीद, मका हमीभाव खरेदी केंद्रात आतापर्यंत १३ हजार ११४ क्विंटल उडीद, तर १२ हजार २०० क्विंटल मका खरेदी करण्यात आली असून, यापैकी अनेक शेतकऱ्यांचे उडीद विक्रीचे धनादेश काढण्यात आले आहेत. मात्र मका खरेदीची रक्कम शासनाकडून अद्याप जमा झाली नाही. ती जमा करावी, याबाबत जिल्हा मार्केटिंग फेडरेशनकडे पत्रव्यवहार सुरू असून, ती रक्कम जमा झाल्यावर शेतकऱ्यांच्या खात्यावर वर्ग करण्यात येईल, अशी माहिती समितीचे उपसभापती सुहास पाटील-जामगावकर यांनी दिली.
श्री. पाटील म्हणाले, की उडीद खरेदी केंद्रात २४ ऑक्टोबर २०१७ ते १२ जानेवारी २०१८ दरम्यान २१२६ शेतकऱ्यांकडून प्रतिक्विंटल ५४०० हमीभावाप्रमाणे १३ हजार ११४ क्विंटल उडीद खरेदी करण्यात आले. त्यामध्ये सात कोटी आठ लाख १२ हजार ९०० रुपयांची उलाढाल झाली. त्यापैकी एक हजार १७६ शेतकऱ्यांना तीन कोटी ९० लाख ६९ हजार रुपयांचा धनादेश देण्यात आला. उर्वरित ९५० शेतकऱ्यांचे तीन कोटी ७३ लाख ८३२ रुपये शासनाकडून आल्यानंतर धनादेश काढण्यात येणार आहे.
५ डिसेंबर रोजी सुरू करण्यात आलेल्या मका हमीभाव केंद्रात आतापर्यंत प्रतिक्विंटल एक हजार ४२५ रुपये हमीभावाने २६० शेतकऱ्यांची १२ हजार २०० क्विंटल मका खरेदी करण्यात आला. त्याची एक कोटी ७३ लाख ७५ हजार रुपयांची रक्कम अद्याप शासनाकडून मिळाली नसल्याने शेतकऱ्यांना रक्कम देता आली नसल्याचे ते म्हणाले.
तसेच शासकीय तूर हमीभाव खरेदीसाठी ऑनलाइन नोंदणी सुरू असून, दोन हजार १०७ शेतकऱ्यांचे अर्ज प्राप्त झाले आहेत. त्यापैकी ७५१ शेतकऱ्यांची ऑनलाइन नोंदणी झाली आहे, उर्वरित नोंदणी सुरू आहे. शेतमाल तोरण योजनेत एकूण १० शेतकऱ्यांनी २१९ क्विंटल माल तारण ठेवला असून, तीन लाख १० हजार १०० रुपये केवळ सहा टक्के दराने सहा महिन्यांच्या मुदतीवर अदा करण्यात आले आहेत, असेही ते म्हणाले.