पुण्यातील डाळिंब, पेरू, चिकू बागांना पीकविम्याचे कवच

पुणे  : जिल्ह्यातील मृग बहारातील डाळिंब, पेरू, चिकू या फळपिकांना पंतप्रधान पीकविमा योजनेचे कवच मिळणार आहे. पीक विमा योजनेत सहभागासाठी पेरूसाठी १४ जून, चिकूसाठी ३० जून, तर डाळिंबासाठी १४ जूलैपर्यंत बॅंकांमध्ये प्रस्ताव सादर करण्याची अंतिम मुदत असल्याचे जिल्हा अधीक्षक कृषी अधिकारी कार्यालयातर्फे सांगण्यात आले.

पंतप्रधान पीकविमा योजनेअंतर्गत पुनर्रचित हवामानाधारित फळ पीकविमा योजना २०१८-१९ वर्षांतील फळबागांना लागू करण्यात आली आहे. कमी-जास्त पाऊस, पावसात पडलेले खंड, सापेक्ष आर्द्रता या धोक्यांपासून निर्धारित कालावधीत शेतकऱ्यांना विमा योजनेचे संरक्षण आणि अर्थसाह्य देण्याच्या उद्देशाने ही योजना राबविण्यात येते.

जिल्ह्यातील डाळींब, पेरू, चिकू या पिकांसाठीच्या विमा योजनेसाठी टाटा एआयजी इन्शुरन्स कंपनीची निवड करण्यात आली आहे. कर्जदार शेतकऱ्यांसाठी ही योजना अनिवार्य असून, बिगर कर्जदार शेतकऱ्यांना योजनेतील सहभाग एेच्छिक आहे.

हवामानबदलामुळे म्हणजेच फूलधारणा व फळधारणेच्या कालावधीत प्रत्येक आठवड्याच्या सरासरी पावसापेक्षा कमी जास्त पावसामुळे होणाऱ्या संभाव्य नुकसानीस विमा संरक्षण देय राहील. शेतकऱ्यांना विमा संरक्षित रकमेच्या केवळ पाच टक्के रक्कम विमा हप्ता म्हणून भरायची आहे.

नुकसानभरपाई ठरविताना महावेध प्रकल्पाअंतर्गत महसूल मंडळ स्तरावरील स्वयंचलित हवामान केंद्राच्या आकडेवारी विचारात घेतली जाणार असल्याने मानवी हस्तक्षेप राहणार नाही. जिल्ह्यातील जास्तीत जास्त शेतकऱ्यांनी या योजनेत सहभागी होण्याचे आवाहन जिल्हा अधीक्षक कृषी अधिकारी कार्यालयाच्या वतीने करण्यात आले आहे.  

फळ पीकविमा लागू असलेले तालुके