अकोला : शेतकऱ्यांचे उत्पन्न दुप्पट करण्यासाठी शासनाने अाखलेल्या उन्नत शेती समृद्ध शेतकरी मोहिमेअंतर्गत कृषी यांत्रिकीकरणासाठी शासन अार्थिक पाठबळ देत आहे. परंतु या योजनेतून वेळेत अनुदान मिळत नसल्याने गेल्या वर्षातील लाभार्थी अार्थिक अडचणीत आले अाहेत. विशेष म्हणजे या योजनेअंतर्गत लाभ देण्यासाठी जिल्ह्यात शेतकऱ्यांकडून नव्याने अर्ज मागवण्याची प्रक्रिया युद्धपातळीवर राबवली जात अाहे. पण जुने अनुदान दिले जात नसल्याची वस्तुस्थिती समोर अाली अाहे.
उन्नत शेती-समृद्ध शेतकरी अंतर्गत शेतकऱ्यांना रोटाव्हेटर, मळणीयंत्र, ट्रॅक्टर, पॉवर टिलर, पेरणी यंत्र, डाळमिल, कपाशी श्रेडर, कल्टिव्हेटर, पॉवर विडर, पाइप, पंप संच अशाप्रकारचे विविध यंत्रे घेता येतात. शेतकऱ्यांना त्याच्या गरजेनुसार हवे असलेले यंत्र घेण्यासाठी शासनाकडे अाॅनलाइन अर्ज दाखल करावा लागतो. सध्या अशा प्रकारचे अर्ज मागवण्यासाठी जनजागृती केली जात अाहे.
एकीकडे हे अर्ज मागवत असताना दुसरीकडे मागील वर्षातील अनुदानाबाबत मात्र जिल्ह्यातील यंत्रणा काहीही सांगायला तयार नसल्याचे शेतकऱ्यांनी सांगितले. अनुदानाबाबत विचारणा करण्यासाठी गेल्यास शेतकऱ्यांना शासनाकडूनच अनुदान मिळालेले नसल्याचे एकच उत्तर एेकायला मिळते. शिवाय ते अनुदान कधी येईल याची निश्चित माहितीसुद्दा अधिकारी देत नाहीत.
योजनेतून ट्रॅक्टरसारखे मोठे यंत्र घेतलेल्या शेतकऱ्यांना एक ते सव्वा लाखांपर्यंत अनुदान दिले जाणार अाहेत. मागील वर्षात सर्व प्रक्रिया पूर्ण केल्यानंतर शेतकऱ्यांनी पाच महिन्यांपूर्वी ट्रॅक्टर खरेदी केले. यासाठी पैशांची जुळवाजुळव केली होती. अनुदान अाल्यानंतर पैशांची परतफेड करता येईल, या उद्देशाने व्यवहार केलेले शेतकरी सध्या अार्थिक अडचणीत सापडले अाहेत.
अकोला जिल्ह्याचा विचार केला, तर सुमारे ६०० ट्रॅक्टर वाटप झालेले अाहेत. यासाठी सहा कोटी ८९ लाख रुपये अनुदानाची गरज अाहे. नवीन वर्षात या योजनेची नव्याने अंमलबजावणी सुरू झाली असताना अातापर्यंत मागील अनुदान जिल्ह्याला अालेले नाहीत. पर्यायाने शेतकऱ्यांनाही मिळू शकलेले नाही. हंगामापूर्वी तरी निदान हे अनुदान मिळावे, अशी अपेक्षा शेतकरी व्यक्त करीत अाहेत.