पुणे ः उन्हाळी हंगामात कीड - रोगांचा फारसा प्रादुर्भाव होत नसल्याने पुणे जिल्ह्यातील शेतकरी बाजरी पिकाकडे वळत आहेत. यंदाही शेतकऱ्यांचा उन्हाळी बाजरी पिकाकडे अधिक कल असल्याचे दिसून येते. जिल्ह्यातील शेतकऱ्यांनी ४१७० हेक्‍टरवर उन्हाळी बाजरीची पेरणी केली आहे. या क्षेत्रात आणखी वाढ होण्याची शक्‍यता कृषी विभागाच्या सूत्रांनी वर्तविली आहे.
पावसाळ्यात बाजरी पिकावर किडी- रोगांचा मोठा प्रादुर्भाव दिसून येतो. परिणामी उत्पादनात घट होते. त्यामुळे शेतकऱ्यांनी बाजरी पीक पावसाळ्यात घेण्याऐवजी उन्हाळ्यात घेण्यावर भर दिला आहे. याशिवाय चांगल्या दर्जाचा चाराही उन्हाळ्यात उपलब्ध होतो. त्यामुळे आंबेगाव, खेड, जुन्नर तालुक्‍यांतील शेतकरी मोठ्या प्रमाणात बाजरीची पेरणी करत आहेत.
यंदा जुन्नर तालुक्‍यात सर्वाधिक लागवड बाजरीची झाली आहे. यात नारायणगाव, खोडद, बोरी, बेल्हे, हिवरेतर्फे, आळेफाटा, मांजरवाडी, वारूळवाडी, ओतूर, रोकडी, उंब्रज, डिंगोरे, आर्वी, कुरण, कांदळी, निमगाव सावा आदी गावांचा समावेश आहे. तालुक्‍यात बाजरीचे सरासरी क्षेत्र १४०० हेक्‍टर आहे. त्यापैकी २५६० हेक्‍टर क्षेत्रावर पेरणी झाली आहे.
खेडमध्ये ८१० हेक्‍टरवर पेरणी झाली असून, वाफगाव, कळूस, दावडी, गुंडाळवाडी, बुरसेवाडी, सोयगाव अशा अनेक गावांत बाजरीची पेरणी झाली आहे. आंबेगाव तालुक्‍यात ७६० हेक्‍टरवर पेरणी झाली आहे. यामध्ये निरगुडसर, अवसरी, धामणी, कळंब, मंचर, पेठ आदी गावांचा समावेश आहे.
