सांगली बाजार समितीत नोकर भरतीला हिरवा कंदील

सांगली : सांगली कृषी उत्पन्न बाजार समितीमध्ये सहा महिन्यांपासून चर्चेत असलेल्या नोकर भरतीला अखेर पणन संचालकांकडून हिरवा कंदील मिळाला आहे. बाजार समितीत १९ रिक्त जागा भरण्यास मंजुरी मिळाली आहे, तसेच ९ जागा पदोन्नतीने भरण्याबाबतचेही आदेश दिले आहेत. पणनच्या निर्णयाने भरतीचा मार्ग मोकळा झाला आहे. एका महिन्यात ही प्रक्रिया पूर्ण करणार असल्याची माहिती बाजार समितीचे सभापती प्रशांत शेजाळ यांनी दिली.

श्री. शेजाळ म्हणाले, की कृषी उत्पन्न बाजार समितीचे मिरज, कवठेमहांकाळ आणि जत तालुक्‍यात कार्यक्षेत्र आहे. बाजार समितीत हळद, बेदाण्याची बाजारपेठ असल्याने परराज्यातील मोठ्या शेतीमालाची आवक होते. तीन तालुक्‍यात दुय्यम आवारामध्ये कर्मचाऱ्यांची नियुक्ती करण्यात येते. बाजार समितीला १३९ कर्मचाऱ्यांची पदे मंजूर आहेत. त्यापैकी सध्या ११३ कार्यरत आहेत. २९ रिक्त पदे भरण्यासाठी याबाबतचा प्रस्ताव प्रशासनाने पणन मंडळाकडे तीन महिन्यांपूर्वी सादर करण्यात आला होता. पणन संचालकांनी १९ जागा भरण्यासाठी मंजुरी दिली आहे.

नोकरभरतीसाठी जाहिरात, रोजगार नोंदणी कार्यालयाकडून बेरोजगारांची यादी मागवली जाईल. दोन्हीच्या आधारे, शासकीय आरक्षणानुसार भरती केली जाईल. कर्मचारी भरतीसाठी नामावली बिंदूला यापूर्वी मान्यता घेतलेली आहे.

भरती पूर्णपणे गुणवत्तेवर, पारदर्शीपणे होईल. बाजार समितीच्या कारभारासाठी सध्याचे मनुष्यबळ अपुरे पडत आहे. त्यातही आधुनिक तंत्रज्ञान अवगत असलेल्यांची संख्या कमी आहे. भविष्यात सध्याच्या कर्मचाऱ्यांना पदोन्नती देऊन आणखी १० कर्मचारी भरतीची परवानगी मागितली जाईल, असेही शेजाळ म्हणाले.