नागपूर विभागातील सहा जिल्ह्यांत १२२९ शेतीशाळा

नागपूर ः लागवड ते कापणीपर्यंत तंत्रशुद्ध शेती व्यवस्थापनाचे धडे देणाऱ्या शेतीशाळांना नागपूर विभागात शेतकऱ्यांचा वाढता प्रतिसाद आहे. विभागातील सहा जिल्ह्यांत सुमारे १२२९ शेतीशाळा घेण्यात येत असून, त्याकरिता खास पीकनिहाय शेड्यूल तयार करण्यात आले आहे. आधुनिक तंत्रज्ञान या विषयावरदेखील चार शेतीशाळा घेण्यात येत आहेत.  कृषी विभागाचे सचिव एकनाथ डवले यांनी शेतकरी तसेच कृषी विभागात संवाद वाढत तंत्रज्ञानाची देवाणघेवाण व्हावी त्यासोबतच पिकाच्या निरीक्षणाचा हेतूही साधला जावा याकरिता शेतीशाळांची संकल्पना मांडली. त्यानुसार राज्यात या हंगामापासून शेतीशाळा सुरू करण्यात आल्या आहेत. कृषी सहायक व कृषी पर्यवेक्षकांना शेतीशाळा सक्‍तीच्या आहेत. त्यानुसार नागपूर विभागातील सहा जिल्ह्यात १२२९ शेतीशाळा २५ मे पासून सुरू आहेत. नानाजी देशमुख कृषी संजीवनी प्रकल्पात वर्धा या एकमेव जिल्ह्याचा समावेश असल्याने या ठिकाणी अतिरिक्‍त १४० शेतीशाळा घेण्यात येत आहेत. गडचिरोली व भात उत्पादक इतर दुर्गम जिल्ह्यात शेतीशाळांना शेतकऱ्यांचा प्रतिसाद वाढता आहे. सोयाबीन सहा, कापूस व भात आठ याप्रमाणे अभ्यासक्रमाचे शेड्यूल तयार आहे. वनामती येथे कृषी सहायक व पर्यवेक्षकांकरिता यापूर्वी प्रशिक्षण घेण्यात आले. शेतीशाळांमध्ये लागवड ते काढणी असे शेड्यूल असून त्यासोबतच विरंगुळा म्हणूनदेखील काही उपक्रम राबविले जातात. क्रॉपसॅपशी शेतीशाळा संलग्न असल्याने नियमित निरीक्षणाचा उद्देशही साधला जातो. 

अशा आहेत पीकनिहाय शेतीशाळा

ज्या पिकाखालील ७० टक्‍के क्षेत्र त्या गावात असेल त्याच पिकाची शेतीशाळा घेतली जात आहे. शेतीमध्ये महिलांचा सर्वाधिक सहभाग असल्याने महिला शेतीशाळांवर जाणीवपूर्वक भर दिला गेला आहे. महिला कृषी सहायकांना महिला शेतीशाळा घेण्याचे निर्देश दिले आहेत. - रवींद्र भोसले, विभागीय कृषी सहसंचालक, नागपूर