धुळे : जिल्ह्यात मागील हंगामातील खरिपातील पिकांसंबंधीच्या विम्याचे शेतकऱ्यांकडून घेतलेले हप्ते निर्देशित विमा कंपनीकडे न जमा करता ते इतरत्र भरल्याचे समोर आले आहे. यामुळे जिल्ह्यातील अनेक शेतकरी मागील खरीप पीकविमा योजनेच्या भरपाईपासून वंचित राहिले आहेत.
अनेक गावांमध्ये हा प्रकार घडला असून, यामुळे शेतकरी त्रस्त आहेत. बॅंकांच्या चकरा त्यांना सतत माराव्या लागत आहेत. 2017-18 च्या खरिपात नियमीत कर्जदारांकडून बॅंकांनी पंतप्रधान पीकविमा योजनेतून विमा हप्ता घेतला होता. ज्वारी, कडधान्ये, गळीत धान्य, कापूस आदींसाठी विमा हप्ता शेतकऱ्यांकडून घेतला. परंतु जो विमा हप्ता कापण्यात आला. त्यातील मोठी रक्कम दुसऱ्या संस्थेच्या खात्यावर जमा केली. विमा कंपनीकडे संबंधित रक्कम पोचलीच नाही. धुळे तालुक्‍यातील नेर येथील सेंट्रल बॅंकेच्या शाखेत हा प्रकार घडल्याचे शेतकऱ्यांचे म्हणणे आहे.
दुष्काळी स्थितीमुळे नेर व परिसरातील शेतकऱ्यांना विमा कंपनीकडून भरपाई प्राप्त व्हायला हवी. या संदर्भात शेतकऱ्यांनी बॅंकेत विचारणा केली असता त्यांना विमा हप्ता विमा कंपनीकडे प्राप्त झालेला नसल्याचे लक्षात आले. या प्रकरणी शेतकऱ्यांनी बॅंक व्यवस्थापकांना घेराव घातला. नंतर जिल्हाधिकाऱ्यांच्या लक्षात हा प्रकार आणून दिला.
जिल्हाधिकारी राहुल रेखावार यांनी संबंधित बॅंकेचे तत्कालीन व्यवस्थापक व इतर अधिकाऱ्यांना बोलावून झालेल्या प्रकाराची माहिती घेतली. या संदर्भात विमा कंपनी, सेंट्रल बॅंकेचे वरिष्ठ यांनी मिळून मार्ग काढावा. त्यांना जिल्हाधिकारी यांना याबाबतची माहिती द्यावी, असा निर्णय जिल्हाधिकाऱ्यांसोबतच्या बैठकीत झाला. यासंदर्भात बॅंकेतील संबंधित अधिकाऱ्यांनी पोलिसांकडे तक्रार केली असून, याबाबत योग्य ती मदत बॅंकेला मिळावी. शेतकऱ्यांनी बॅंक अधिकाऱ्यांना बंदी बनविल्याचा आरोप या अधिकाऱ्यांनी केला आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.