पुणे जिल्‍ह्यात सर्वदूर पावसाच्या सरी

पुणे  : जिल्‍ह्यात पावसाने सर्वदूर हजेरी लावली असून, पूर्व भागातील कोरडवाहू तालुक्यात हलक्या ते मध्यम स्वरूपाच्या पावसाने हजेरी लावली आहे. धरणांच्या पाणलोट क्षेत्रात पावसाचा जोर अधिक असल्याने पाण्याचा मोठा विसर्ग सुरूच आहे. भीमा नदीतून पाण्याची आवक होत असल्याने उजनी धरणाच्या पाणीसाठ्यात वाढ होत आहे.

जिल्ह्यात सोमवारपासून सुरू झालेल्या पावसाचा जोर मंगळवारी (ता.२१) आणखी वाढून दिवसभर संततधार पाऊस पडला. रात्रभर अनेक भागांत पावसाची रिपरिप सुरू होती. बुधवारी सकाळी अनेक ठिकाणी जोरदार पाऊस पडला. दुपारनंतर मात्र पावसाने उघडीप दिल्याचे चित्र होते. पश्‍चिम भागातील पावसाचा जोर अधिक होता. दुष्काळी पट्ट्यांतही हलक्या पावसाने हजेरी लावली आहे. हा पाऊस धाेक्यात आलेल्या खरिपाला जीवदान देणारा ठरणार अाहे.

मुळा-मुठा, निरा, भीमेच्या उपखोऱ्यातील सर्वच धरणांसह कुकडी खोऱ्यातील डिंभे धरणातून पाण्याचा विसर्ग सुरू आहे. त्यामुळे मुळा-मुठा, भीमा, इंद्रायणी, पवना, निरेसह अनेक नद्या दुथडी भरून वाहत आहे. डिंभे धरणातून ७ हजार क्युसेक, मुळशीतून १० हजार, खडकवासला धरणातून १५ हजार तर वीर धरणातून २३ हजार क्युसेक वेगाने पाणी सोडण्यात आले आहे. भीमेच्या खाऱ्यातील नद्यांच्या पाण्यामुळे भीमेला पूर आला असून,  दौंड येथे पात्रातून ५७ हजार क्युसेक वेगाने उजनी धरणात पाणी वाढत आहे.

बुधवारी (ता.२२) सकाळी आठ वाजेपर्यंतच्या २४ तासांमध्ये जिल्ह्यात पडलेला पाऊस (मिमी) : पौड ४१, घोटावडे ४३, माले ५४, मुठे ९९, भोलावडे ९५, निगुडघर ५१, काले १०२, कार्ला ५२, लोणावळा ८६, शिवणे ४३, वेल्हा ४३, वेल्हा ५८, पानशेत ५८, राजूर ९४, आपटाळे ४०, वाडा ४८.