केंद्र आणि राज्याच्या मंत्र्यांना कांदे फेकून मारू ः राजू शेट्टी

नाशिक  : अगोदरच मागील कांदा विक्रीचे अनुदान येणे बाकी आहे. खरीप हंगामाच्या तोंडावर याबाबत विचारणा केली असता काम सुरू आहे, असे सरकारी उत्तर मिळते. उन्हाळ कांद्याला चार पैसे चांगला भाव मिळत होता, मात्र हे सरकारला बघवले नाही. कांदा निर्यात अनुदान बंद केले. जोपर्यंत सरकार हा निर्णय मागे घेत नाही, तोपर्यंत या भागात केंद्र आणि राज्याचे मंत्री आले तर त्यांना कांदे फेकून मारू, असा इशारा राजू शेट्टींनी सरकारला दिला आहे.  नाशिक येथील हुतात्मा स्मारकामध्ये आयोजित केलेल्या पत्रकार परिषदेत ते बोलत होते. या वेळी ते म्हणाले, की कधी नव्हे एवढा शेतकरी अडचणीत सापडला आहे. कृषी व्यवस्थेची वाताहत झाली आहे. शेतकऱ्याने केलेला उत्पादन खर्च निघत नाही. आज देशाच्या गरजेपेक्षा अधिक कांद्याचे उत्पादन झाले आहे. राज्यात बाजार समितीत एखादे वक्‍कल १६०० ते १७०० रुपयांपर्यंत काढले जाते. सर्वसाधारण भाव १३०० च्या पुढे गेला नसल्याची परिस्थिती आहे. कांदा निर्यात अनुदान बंद केल्यामुळे कांदा १००० रुपयांच्या आत येणार आहे. परिणामी, शेतकरी अजून अडचणीत येणार आहे. या वेळी स्वाभिमानी शेतकरी युवा आघाडीचे प्रदेशाध्यक्ष हंसराज वडघुले, राज्य प्रवक्ते प्रा. संदीप जगताप, जिल्हाध्यक्ष सुधाकर मोगल, राजू देसले आदी उपस्थित होते.  मुख्यमंत्र्यांवर गो हत्येचा गुन्हा दाखल करा नांदगाव मधील चांदोरे गावात वेळेत चारा छावणी सुरू न केल्याने चारापाण्याअभावी ५५ गायी मृत्युमुखी पडल्या. एक बाजूला सरकारने गोवंश हत्याबंदीचा कायदा केला. मात्र या ठिकाणी सरकारच्या धोरणामुळे गायीच्या मृत्य झाला. या प्रकरनी मुख्यमंत्री देवेंद्र फडणवीस यांच्यावर गो हत्येचा गुन्हा दाखल करावी, अशी मागणी केली आहे.